Подобрувањето на работата на џудо тренерите, во фокусот на проектот „Подобри го својот клуб“

Џудо федерацијата на Македонија за прв пат ќе организира семинар посветен на подобрување на работата на тренерите во џудо клубовите. Семинарот кој е дел од проектот „Подобри го својот клуб“, се одржува под покровителство на Џудо федерацијата и Европската џудо унија (ЕЏУ), кој е одобрен по одржаните состаноци во Луксембург.

Предавач на семинарот ќе биде Фредерик Демонфакон, ЕЏУ експерт од Франција 6 ДАН, кој е лидер на проектот. На семинарот како висок претставник на ЕЏУ ќе биде присутна и Џејн Бриџ, потпретседателка на ЕЏУ.

Семинарот ќе се одржи во сабота и недела, 29 и 30 јануари во Сопје, во салата на Спортскиот центар „Кале“.

Во рамките на семинарот ќе им биде обновена лиценцата за работа на актуелните џудо тренери, а ќе бидат издадени и нови лиценци за работа на сите оние кои ги исполнуваат условите од Правилникот за едукација и лиценцирање на џудо тренери.