Пожари кај Лос Анџелес: Нови загинати и сериозни обвинувања

И по неколкудневното беснеење, разорните пожари околу американската метропола Лос Анџелес се уште не се изгаснати. Бројот на потврдени смртни случаи се искачи на единаесет. Сепак, властите стравуваат дека бројот ќе продолжи да се зголемува откако истражителите ќе можат безбедно да стигнат до областите, од кои некои се целосно уништени. Три пожари остануваат надвор од контрола, вклучително и особено силниот „Палисејдс пожар“ во областа Пацифик Палисејдс. Тамошната противпожарна служба ја прошири наредбата за евакуација и во други области рано утрината. Округот Лос Анџелес, во меѓувреме,  прогласи локална здравствена вонредна состојба поради опасниот чад, објавија американските медиуми.

Првичен напредок во гаснењето

Намалувањето на ветровите им помогна на пожарникарите да постигнат првичен успех во гаснењето на пожарите, кои претседателот на САД, Џо Бајден ги означи како „најразорни во историјата на Калифорнија“. Имено два од најголемите пожари во регионот, „Херст пожар“ и „Лидија пожар“, беа во голема мерка локализирани. Слабеењето на ветровите, исто така, веројатно ќе им обезбеди на пожарникарите на теренот клучна воздушна поддршка, бидејќи авионите може да испуштаат вода и средства за гаснење на запалените ридови околу калифорниската метропола.

Но, метеоролозите предупредуваат дека налетите на ветер повторно ќе се засилат овој викенд. „Ситуацијата останува многу опасна“, рече шефот на американската агенција за катастрофи ФЕМА, Дин Крисвел.

Агенцијата проценува дека повеќе од 12.000 објекти биле уништени или оштетени од пожарите. Според ФЕМА, околу 58.000 други се изложени на ризик. Од вторникот, околу 15.000 хектари земја биле уништени од огнената стихија. Наредбата за евакуација остана на сила за повеќе од 100.000 жители, а предупредени се уште десетици илјади луѓе. Приватниот сервис за временска прогноза АкуВедер ја процени штетата и економската загуба од пожарите до 150 милијарди долари (146 милијарди евра).

Шефицата на пожарникарите го критикува кратењето на буџетот

Во меѓувреме, со оглед на обемот на пожарите, започнаа и обвинувањата.  Шефицата на противпожарната служба во Лос Анџелес, Кристин Краули упати сериозни обвинувања против градската администрација. Скратените 17 милиони долари (16,5 милиони евра) во буџетот на противпожарната служба сега имаат негативно влијание врз способноста на пожарникарите да се борат со пожарите, се пожали таа во интервју на американскиот телевизиски канал СиЕнЕн.

„Не можеме повеќе да ја одржуваме сегашната ситуација. Немаме доволно пожарникари“, рече таа. Краули се пожали дека таа постојано истакнувала кога биле поднесени барања за буџет дека нејзината служба има недоволно персонал и е недоволно финансирана. Ќе бидат потребни дополнителни 62 противпожарни станици. Бројот на мисии е зголемен за 55 отсто од 2010 година, но бројот на пожарникари е намален, објасни таа. „Дополнителни ресурси ќе ни помогнат и во моменталната катастрофа“, рече Краули. „Но, во иднина, ова може да се случи каде било во градот Лос Анџелес, и ние треба да бидеме целосно финансирани и поддржани“, апелираше таа.