Според податоците од шумските стопанства, голем дел од пожарите кои последниве месеци ја зафатија нашата држава, се подметнати на терени кои се тешко достапни за протипожарни возила, кои и онака ги има во недоволен број, а се и во лоша состојба. Неодамна објавената база на податоци од Центарот за граѓански комуникации, покажа дека 30 територијални противпожарни единици во земјата имаат само 220 возила за противпожарна заштита, а во таа бројка не се само цистерните и возилата за гасење пожар, туку и сите други возила на противпожарните екипи. Просечната старост на овие возила е 27 години. Дури 154 од 220-те возила (70%) се произведени во минатиот век. Најстари се две возила од 1966 година, кои ги поседуваат Струмица (од марката ФАП 13) и Валандово (од марката ТАМ 5500).
Најстари се противпожарните возила во Кратово, со просечна старост од 39 години, а “најмладиот“ возен парк го има Велес чии возила се со просечна старост од 18 години. Просечна старост поголема од 30 години имаат и возилата на противпожарните единици во Битола, Гевгелија, Крива Паланка, Крушево, Охрид, Свети Николе, Струга и Струмица.
Согласно со бројот на жители, најмногу возила има противпожарната единица на Град Скопје со 47 возила, просечно стари 26 години. Следува Битола, која ги покрива и Новаци и Могила, со 13 возила просечно стари по 30 години. Во групата со повеќе од 10 возила спаѓа и Струмица, која ги покрива и општините Босилово, Василево и Ново Село, со 12 возила кои се со просечна старост од 30 години. Најмалку, односно по 3 возила, имаат територијалните единици во Демир Хисар (просечно стари 28 години), Кавадарци (просечно стари 25 години), Кратово (просечно стари 39 години), Крушево (просечно стари 38 години) и Македонски Брод (просечно стари 21 година).
Извор: DW