ПУБЛИКУМ Вистината на прво место
Во организација на Владата на Република Северна Македонија, денеска се чествува големиот празник, Денот на независноста – „8 Септември“.
Програмата по повод одбележувањето на Денот на независноста на нашата татковина, започна со оддавање почит и положување свежо цвеќе на вечните почивалишта на починатите претседатели на државата Борис Трајковски и Киро Глигоров, од страна на Владина делегација предводена од претседателот на Владата на Република Северна Македонија Зоран Заев.
Премиерот Заев на положувањето цвеќе на Градските гробишта во Бутел, беше придружуван од првиот заменик-претседател на Владата и министер за политички систем и односи меѓу заедниците, Артан Груби, Љупчо Николовски, заменик-претседател на Владата на Република Северна Македонија задолжен за борба против корупцијата и криминалот, одржлив развој и човечки ресурси, Мила Царовска, министерка за образование и наука и Јагода Шахпаска министерка за труд и социјална политика.
Венци со цвеќе положија и официјалните делегации на Претседателот на државата, на Собранието, на Министерството за одбрана и Армијата на Република Северна Македонија, Сојузот на борци, претставници на политичките партии, дипломатскиот кор и на Град Скопје.
По повод 8 Септември, годинава во организација на Владата на Република Северна Македонија се одржува централна свеченост на платото пред зградата на Владата согласно протоколот за одбележување државни празници на Комисијата за заштита од заразни болести односно без масовни народни собири, со минимум присутни лица и почитување на здравствените протоколи и обезбедена дистанца и заштита.
