Прилепскиот театар „Војдан Чернодрински“ со претставата „ Љубовни пози на историјата (,,Figurae veneris, historiae“) од Горан Стефановски, во режија на Наташа Поплавска,  ќе учествува на 15 издание на Меѓународниот фестивал на глумци, што од 26 ноември до 2 декември 2018 се одржува во Никшиќ, Црна Гора.

Претставата на програмата на фестивалот ќе биде прикажана на 29 ноември, а публиката ќе има можност да ја проследи одличната претстава која отвора бројни прашања во однос на војната, љубовта, интимата, политиката и моралноста.

Претставата „Figurae Veneris Historiae“, во која играат  Димитар Ѓорѓиевски, Даниела Иваноска , Игор Трпчески, Зоран Иваноски,  Катерина Чакмакоска Клинческа, Јасмина Мицовска Станкоска , Димитар Црцороски,  Наташа Наумоска,  Илија Волчески,  Ангела Наумоска и Михајло Миленкоски,  јасно покажува дека војната менува сѐ, тргнува во неочекувани правци, ги трансформира луѓето, ги прави  ѕверови, непрепознатливи, различни од порано. Но колку и да изгледа парадоксално, вистинската сила која го придвижува дејството во оваа претстава не произлегува од суровоста и страдањето, туку од љубовта  и силните емоции.