На матичната сцена на театарот „Војдан Чернодрински“, во тек се подготовките за претставата „Демократија!“ од  рускиот поет, нобеловец и добитник на Златниот венец на Струшките вечери на поезијата, Јосиф Бродски. Се работи за неговото единствено драмско дело, пишувано во бурната 1989 година, време на рушењето на Берлинскиот ѕид, обединувањето на Германија, распаѓањето на Варшавскиот пакт и почетокот на распадот на Советскиот Сојуз.

Иако драмата ја пишува во емиграција во САД, каде што заминува прогонет од советскиот комунистички режим во 1971 година, Јосиф Бродски со хируршка прецизност ги опишува тогашните состојби. Но, исто така благодарение на неговото визионерство со кое што се надарени најдобрите, ова негово драмско дело допира до нашето време со истата свежина и актуелност како да е пишувано вчера.

„Демократија“ е политичка гротеска за една измислена земја, за едни измислени ликови, но реални проблеми кои што се совпаѓаат со проблемите на повеќето земји од Источна Европа или Западен Балкан – вели режисерот Петрески.

Актерската екипа ја сочинуваат Марјан Чакмакоски, Димитар Георгиевски, Ангела Наумоска, Михајло Миленкоски и Димитрина Мицкоска. Сценограф е Зоран Николовски, музиката е на Марјан Неќак, а костимите на Розе Трајчевска.

Претставата е дел од годишната програма на театарот, поддржана од Министерството за култура.