Просечната цена на струјата за домаќинствата ќе се зголеми за 0,92 проценти

Просечната цена на струјата за домаќинствата од 1 јануари ќе се зголеми за 0,92 проценти, најави денеска претседателот на Регулаторната комисија за енергетика Марко Бислимоски.

Во првиот блок, зголемувањето е 0,68 проценти, во вториот за 0,9 проценти, во третиот за 1,93 проценти, во четвртиот за 2,24 проценти, додека во евтината тарифа за 0,9 проценти.

Тоа значи дека едно просечно домаќинство во државата кое има сметка од 2300 денари ќе има зголемен трошок од 21 денар.

РКЕ првпат донесе одлука во која е искористен контролниот механизам во определувањето на цената на електричната енергија.

Согласно барањето на ЕВН хоум, цената за домаќинствата, како што рече, требаше да се зголеми за 4,4 проценти.

„Во најголем дел немавме разлики, а единствената разлика која постои меѓу тоа што сега го одобривме и тоа што го достави ЕВН е во однос на факторот на корекција и за да обезбедуваме ценова стабилност и цени кои ќе имаат минимално влијание врз вкупните трошоци за електрична енергија на граѓаните постапивме на овој начин. Како што ветивме, просечната цена на електричната енергија за домаќинствата се зголемува за 0,92 проценти“, рече Бислимоски.

Извор: МЕТА