Први налози за апсење во турскиот фудбалски обложувачки скан

Во рамките на истрагата за скандалот со обложување во турскиот фудбал, суд во Истанбул издаде налози за апсење на осум лица. Меѓу нив, покрај неколку судии, се наоѓа и претседателот на прволигашкиот клуб Ејупспор (Eyüpspor), Мурат Озкаја, јави државната новинска агенција „Анадолу“.

Ејупспор од 2024 година игра во Суперлигата, а во својата прва сезона во највисокото турско првенство клубот го освои шестото место.

Како што е соопштено, други единаесет лица биле пуштени на слобода под одредени услови. Во петокот (7.11) судот нареди притвор за вкупно 21 осомничен. Тие се обвинети за злоупотреба на службена положба и манипулација на натпревари.

Повеќе од 1000 фудбалери под истрага за манипулација на натпревари

Турската фудбалска федерација (ТФФ) кон крајот на октомври објави дека повеќе од 150 судии се обвинети за активно обложување.

Повеќето од нив веќе се суспендирани на период меѓу осум и дванаесет месеци.

Според податоците на ТФФ, дисциплинската комисија на федерацијата води постапки и против вкупно 1024 играчи, кои исто така се привремено суспендирани.

Репрезентативецот Елмали исфрлен од составот на Турција

Околу 900 од осомничените играле во третата и четвртата турска лига. Меѓу обвинетите се и 27 играчи од Суперлигата, меѓу нив и фудбалери од Галатасарај и Бешикташ.

Меѓу другите, по име беше спомнат и националниот репрезентативец Ерен Елмали, дефанзивец на Галатасарај, кој поради истрагата против него е исфрлен од составот на турската репрезентација за претстојните квалификациски натпревари за Светското првенство против Бугарија (15 ноември) и Шпанија (18 ноември).

Елмали изјави дека се работи за едно единствено обложување од пред неколку години, кое не се однесувало на неговиот тим.

„Во текот на целата моја кариера никогаш не сум ги прекршил етичките принципи на фудбалот, спортскиот дух или вредностите на мојот клуб“, напиша тој на Инстаграм.

Извор: DW