Разорен земјотрес ги погоди Тајланд и Мјанмар

Силен земјотрес со јачина од 7,7 степени меѓу другото го погоди и главниот град на Тајланд Бангкок. Ова го соопшти германскиот центар за географски истражувања Хелмхолц. Американската опсерваторија за земјотреси (УСГС) исто така извести за јачина од 7,7 степени. Според информациите, епицентарот на земјотресот бил на 16 километри северозападно од мјанмарскиот град Сагаинг на длабочина од десет километри. Вториот земјотрес, дванаесет минути подоцна се вели дека бил со јачина од 6,4 степени.

Повеќе од 17 милиони луѓе живеат во пошироката област на Бангкок, од нив многу живеат во високи згради. Продавниците во метрополата биле евакуирани, а бројни луѓе во паника ги напуштиле своите домови, останувајќи на улица со минути по земјотресот. Потресот бил толку силен што водата избила од базените, пренесува новинската агенција АП.

Според локалната полиција, се урнала висококатница во изградба, сѐ уште не е јасно дали има загинати или повредени. На социјалните мрежи кружи видео на кое се гледа како катната зграда и кранот се уриваат, предизвикувајќи облак од прашина. Луѓето врескале и панично бегале.

Тајландската премиерка Паетонгтарн Шинаватра го откажа патувањето за да одржи итен состанок, објави таа на X.

Нема конкретни информации за жртви од Мјанмар. Меѓутоа, во внатрешноста на градот Аунг Бан, се урнал хотел и се смета дека таму се затрупани многу луѓе, како што објавија спасувачките тимови на социјалните мрежи. Земјотресот се случил на околу 50 километри источно од Монива во центарот на земјата. Според извештаите на медиумите, во градот Мандалај на исток, вториот по големина град во Мјанмар, се урнале згради, а во Сагаинг се урнал стар мост.

Земјотресите се релативно чести во Мјанмар.  Според УСГС, помеѓу 1930 и 1956 година, шест силни земјотреси со магнитуда од најмалку 7 степени се случиле во близина на таканаречениот Сагаинг Фаулт, кој минува низ земјата од север кон југ.

Кинеската управа за земјотрес  соопшти јачина од 7,9 степени на потресот регистриран во земјата и соопшти дека земјотресот се случиле во јужната провинција Јунан. Според медиумите, меѓу погодените се и големиот град Кунминг и местата Лиџијанг и Дали, кои се популарни кај туристите. Агенцијата за цивилна заштита во градот Руили  објави за штети на куќи и повредени, како што пренесоа кинеските медиуми, повикувајќи се на властите.