Официјален редослед за големото финале на Евровизија 2026 во Виена

Европската радиодифузна унија (ЕБУ) и австрискиот национален радиодифузер (ORF) официјално го објавија редоследот за настап во големото финале на Изборот за песна на Евровизија 2026. Спектакуларната завршница ќе се одржи оваа сабота, 16 мај, во Виена, каде 25 држави ќе се борат за престижниот кристален микрофон.

Редоследот на настапи не е случаен – веќе 12 години продуцентите го креираат со прецизна цел да се задржи телевизиската динамика и да се избегне монотоност. Оваа година, одговорноста да го отвори големото финале ѝ е доделена на Данска, додека домаќинот Австрија, според претходно извлечената ждрепка, ќе има привилегија да настапи последна и да го затвори натпреварувачкиот дел под реден број 25.

Анализа на фаворитите: Втората половина ветува победа?

Ако се анализираат квотите на евровизиските обложувалници, станува јасно дека некои држави добија сериозен ветар во грб од продуцентите, додека други ќе мора да се потпрат исклучиво на моќен сценски настап за да не бидат заборавени.

Актуелниот главен фаворит за победа, Финска, извлече речиси идеална позиција – настапува во втората половина под реден број 17. Ова во евровизиската статистика се смета за „златна средина“, бидејќи вниманието на публиката е на највисоко ниво непосредно пред отворањето на телефонските линии за гласање. Слична предност во ждрепката добија и традиционалните евровизиски сили како Шведска (20) и Италија (22), кои со настапот пред самиот крај на шоуто имаат одлична шанса да остават силен последен впечаток и да соберат огромен број поени од телевоутингот.

Од друга страна, земјите кои исто така котираат високо, како Грција (6) и Австралија (8), се соочуваат со сериозен хендикеп. Настапот во раната фаза од првата половина на шоуто често се смета за „опасна зона“, бидејќи постои голем ризик песните да избледат од меморијата на гледачите до крајот на долгата тричасовна вечер.

Дополнителен удар претрпе Германија, која ја доби неславната позиција број 2 – место кое меѓу евровизиските фанови и аналитичари е познато како „позиција на смртта“, од која историски и статистички е речиси невозможно да се оствари висок пласман.

Целосен редослед на настапи

Во продолжение погледнете го целосниот список и редослед по кој ќе настапат државите во саботното финале:

Реден број	Држава	Изведувач	Песна
1	Данска	Søren Torpegaard Lund	Før vi går hjem
2	Германија	Sarah Engels	Fire
3	Израел	Noam Bettan	Michelle
4	Белгија	Essyla	Dancing on the Ice
5	Албанија	Alis	Nân
6	Грција	Akylas	Ferto
7	Украина	Leléka	Ridnym
8	Австралија	Delta Goodrem	Eclipse
9	Србија	Lavina	Kraj mene
10	Малта	Aidan	Bella
11	Чешка	Daniel Zizka	Crossroads
12	Бугарија	Dara	Bangaranga
13	Хрватска	Lelek	Andromeda
14	Обединето Кралство	Look Mum No Computer	Eins, Zwei, Drei
15	Франција	Monroe	Regarde !
16	Молдавија	Satoshi	Viva, Moldova!
17	Финска	Linda Lampenius & Pete Parkkonen	Liekinheitin
18	Полска	Alicja	Pray
19	Литванија	Lion Ceccah	Sólo quiero más
20	Шведска	Felicia	My System
21	Кипар	Antigoni	Jalla
22	Италија	Sal Da Vinci	Per sempre sì
23	Норвешка	Jonas Lovv	Ya Ya Ya
24	Романија	Alexandra Căpitănescu	Choke Me
25	Австрија	Cosmó	Tanzschein

Следете ги најновите вести од шоубизнисот и светот на забавата на Публикум.