Рекорд за најдолг говор во американскиот Сенат

24 часа и 18 минути: Ова претходно се сметаше за рекорд за најдолгиот говор пред американскиот Сенат. Политичарот од Демократската партија Кори Букер сега ја надмина оваа граница. 55-годишниот сенатор од американската сојузна држава Њу Џерси, Кори Букер одржа  маратонски говор, како симболичен протест против политиките на американскиот претседател Доналд Трамп, кој траеше 25 часа и четири минути.

Иако не беше во прашање таканаречен „филибастер“ говор за блокирање усвојувањето на закон, тој сепак ја запре законодавната активност во Сенатот на САД контролиран од републиканците. Правилата за ваквите говори налагаат говорникот да остане на нозе и да не користи паузи за тоалет.

Кори зборуваше, зборуваше, зборуваше…

Споменатиот претходен рекорд за најдолго обраќање од говорницата од 24 часа и 18 минути го држеше републиканскиот сенатор Стром Турмонд, кој во 1957 година, одржа „филибастер“ говорпротивејќи се на Законот за граѓански права.

Букер рече дека ќе зборува онолку долго колку што ќе издржи неговото тело, започнувајќи го говорот во понеделникот вечер околу 19 часот по локално време. Заврши во вторникот во 20 часот и 6 минути..

Сенаторот Букер дел од своето време го исполни читајќи писма од граѓани кои велат дека се погодени од политиката на Трамп.

Поранешниот претседателски кандидат го искористи времето да зборува и за спорт, да рецитира поезија и да одговара на прашања од колегите.

Букер, кој има афро-американско потекло, зборуваше за своите корени како потомок и на робови и на сопственици на робови.

„Тука сум затоа што колку и да е тој моќен, народот е уште помоќен“, рече тој, алудирајќи на рекордниот говор на Турмонд пред 68 години.

Поддршка од Демократската партија

Кога го достигна рекордот, Букер рече дека мора да одговори на „некои биолошки потреби што ги чувствува“.

За време на говорот, тој успеа да одмори слушајќи ги прашањата од колегите, меѓу кои и на лидерот на демократското малцинство во Сенатот Чак Шумер од Њујорк, сенаторот Дик Дурбин од Илиноис и сенаторот Кирстен Гилибрен од Њујорк.

Демократската партија, која моментално е без власт и во Белата куќа и во двата дома на Конгресот, застана зад симболичниот протест на Букер.

Говорот на Букер беше и најдолгиот во Сенатот од 21-часовниот говор осмислен да го блокира усвојувањето на законот против Обамакеар од 2013 година од страна на републиканскиот сенатор од Тексас, Тед Круз.

Круз изјави за Си-Би-Ес дека говорот бил голем физички предизвик.