ПУБЛИКУМ Вистината на прво место
Четвртата по ред конференција EqualXChange 2025, организирана од Алијансата за родова еднаквост на работното место (GEA), го привлече вниманието на јавноста со акцент на три клучни теми: родова еднаквост, пристап до финансии и идни вештини за дигиталната економија. Настанот се одржа под мотото „Empowering Ideas, Inspiring Journeys“.
Во присуство на над 120 учесници и 27 говорници, конференцијата се фокусираше на инклузивно лидерство, поддршка за домашните компании и креирање политики засновани на податоци. Меѓу партнерите на настанот беше и Меѓународната организација на трудот (ILO), која со децении се залага за еднакви услови на труд.
Нина Ангеловска Станков, претседателка на GEA, изјави дека еднаквиот пристап до финансии и поддршка за жените придонесува кон севкупен општествен напредок. Таа се заблагодари на партнерите, вклучувајќи ја и ILO, за поддршката и визијата за системска еднаквост.
На конференцијата беше претставена и најновата публикација „Жените и мажите во Северна Македонија во 2025 година“, издадена од Државниот завод за статистика и UN Women. Директорот на заводот, д-р Дејан Станков, истакна дека податоците се основа за носење информирани одлуки и унапредување на родовата рамноправност.
Панел-дискусиите се осврнаа на теми како што се:
- финансиска едукација за економско зајакнување,
- предизвици на домашните компании во раст и излез на странски пазари,
- родово еднакви работни практики,
- потребата од нови дигитални вештини.
GEA, иницирана од Асоцијацијата за е-трговија на Македонија, има за цел да креира инклузивна работна средина и активно придонесува кон исполнување на Целта за одржлив развој #SDG5 – Родова еднаквост.
Конференцијата беше поддржана од бројни компании, меѓу кои Eurolink, Casys, Halkbank, Филип Морис, Пивара Скопје, А1 Македонија и други.
Повеќе информации и приклучување кон Алијансата: genderequalityalliance.org
