ПУБЛИКУМ Вистината на прво место
Разговорите меѓу Вашингтон и Техеран за ставање крај на американската војна против Иран напредуваат, оцени Џаред Кушнер, американски пратеник за Блискиот Исток и зет на претседателот Доналд Трамп. Двете страни водат „многу позитивни разговори“, изјави тој во понеделникот за телевизиската мрежа Фокс Њуз.
Истовремено, тој предупреди дека „по сите овие години практично нема доверба меѓу САД и Иран“. Кушнер додаде дека претседателот Доналд Трамп ќе биде „многу трпелив“ во преговорите и дека не сака „ништо да се избрзува“. Според него, Трамп ќе „склучи вистински договор кога вистинскиот договор ќе биде подготвен“.
Кушнер сака да го спаси мировниот план за Газа
Кушнер оптимистички се осврна и на состојбата во Појасот Газа. За време на посетата на Израел, тој неколку часа разговараше со премиерот Бенјамин Нетанјаху. По средбата изјави дека во рок од еден месец е можно да се постигне напредок во разоружувањето на исламистичкото движење Хамас во Газа како дел од американскиот мировен план.
Според еден израелски владин претставник, Кушнер и Нетанјаху се согласиле американски генерал да го надгледува и проверува процесот на разоружување на Хамас. До тогаш нема да има повлекување на израелските сили од палестинската територија, изјави Нетанјаху.
Според медиумските извештаи, на разговорите станало збор и за почетокот на обновата на областите кои не се под контрола на Хамас.
Веќе во неделата, Кушнер во Египет разговарал со претседателот Абдел Фатах ел Сиси за иднината на Појасот Газа, кој во голема мера е уништен од војната. Таму тој се сретнал и со претставници на Хамас, организација која повеќе држави ја сметаат за терористичка организација.
Извор: DW
