ПУБЛИКУМ Вистината на прво место
Соопштение за јавност на Комисијата за култура на СДСМ
Изјавите на министерот за култура Зоран Љутков во емисијата „Трилинг“ се целосна лага, свесна манипулација и класичен пример за бегање од одговорност.
Наместо да одговори на сериозните прашања за урбанистичкиот хаос и за уништувањето на заштитените подрачја околу Охридското Езеро, министерот демонстрира ароганција, незнаење и политичка сервилност.
Тврдењето дека „за Министерството сè е завршено“ е скандалозно признание дека државата кренала раце од Охрид. И покрај јасните ревизорски извештаи, предупредувањата од УНЕСКО и очигледните незаконски градби, Управата за заштита на културното наследство и Министерството за култура не постапуваат. Закони има, но важат само за граѓаните, а не и за блиските до ДПМНЕ.
Дополнително, изгледа дека министерот Љутков не си ја знае ниту сопствената улога како претседател на Националната комисија на УНЕСКО. Тоа не е протоколарна функција за сликање и празни фрази, туку позиција што подразбира активна комуникација, иницијативи, алармирање и конкретни мерки за заштита на светското културно и природно наследство. Наместо да ги користи сите механизми што му стојат на располагање за заштита на Охрид, министерот избира молк, незаинтересираност и повлекување. Тоа е директно предавство на јавниот интерес и на меѓународните обврски на државата.
Целосно лицемерно е и неговото однесување во однос на Колективниот договор во културата. Од една страна, Љутков јавно го фали договорот и се обидува да се претстави како заштитник на културните работници, а од друга страна, во реалноста Министерството не го почитува. Обврските од Колективниот договор не се спроведуваат, правата на вработените се газат, а културните институции се оставени во правен и финансиски хаос. Ова е уште еден доказ дека зад убавите зборови нема ниту волја ниту одговорност, туку само празен ПР.
Зоран Љутков е целосно изгубен во времето и просторот. Кога ДПМНЕ беше во опозиција, градоначалникот на Охрид беше од нивните редови, дивоградбите и урбанистичкото дивеење беа премолчувани. Денес, кога ДПМНЕ ја има и централната и локалната власт, повторно нема одговорност, туку само изговори и префрлање вина.
Дополнително, апсурдни се и неговите ставови за Преспанскиот договор. Љутков го напаѓа договорот, додека неговиот лидер и премиер, Христијан Мицкоски, јавно го фалеше ко совршено решение во дадените околности. Ова не е политика, ова е политичка амнезија и лицемерие.
СДСМ јасно порачува: уништувањето на Охрид, заштитата на партиските и бизнис-интересите и лажењето на јавноста не се патриотизам, туку криминално неодговорно однесување. Оваа Влада нема кредибилитет, нема капацитет и нема елементарна морална вертикала.
На Зоран Љутков, искрено, подобро ќе му биде да престане да се појавува во јавноста со вакви смешни, конфузни и невистинити изјави. Со секое ново интервју не ја брани Владата, туку дополнително ја разобличува. Македонија заслужува одговорни функционери што го штитат јавниот интерес, а не министри што молчат кога нивни партиски кадри и поранешни функционери ја бетонираат иднината на Охрид.
