ПУБЛИКУМ Вистината на прво место
Соопштение за јавност на Комисијата за култура на СДСМ
Министерот Зоран Љутков се пофали со нацрт-Стратегија за развој на културата 2026–2030. На хартија, големи зборови, а во реалноста, културата во Македонија никогаш не била во полоша состојба.
Владата на Христијан Мицкоски и ВМРО-ДПМНЕ прво го урна системот во културата, а сега се обидува со стратегија да ја прикрие сопствената неспособност.
Фактите се јасни:
- Буџетот за култура се намалува и е меѓу најниските во последните години;
- Националните институции се оставени без стабилно финансирање и без развојни програми;
- Културното наследство е запоставено и изложено на ризик;
- Уметниците и културните работници се доведени во понижувачка позиција.
Наместо реални политики, власта нуди бирократски документ со општи формулации, без конкретни механизми, без финансиска рамка и без јасна визија.
Да потсетиме: токму Владата предводена од СДСМ во изминатите години ја донесе првата современа стратегија за култура, го отвори секторот кон европските програми, го зголеми буџетот за култура и започна сериозни процеси на заштита на културното наследство.
Денес гледаме обратен процес, централизирање на одлуките, партизација на институциите и целосна стагнација на културниот систем.
Културата не се развива со PR-соопштенија и протоколарни седници. Културата се развива со визија, инвестиции и почит кон уметниците и културните работници.
Затоа оваа „стратегија“ повеќе личи на документ за политички маркетинг отколку на сериозна државна политика.
СДСМ ќе продолжи да предлага конкретни решенија:
- стабилен и транспарентен буџет за култура,
- фонд за заштита на културното наследство,
- рамномерен културен развој низ државата,
- достојни услови за работа на уметниците.
Културата не смее да биде жртва на неспособноста на оваа власт.
