Шахпаска: Борбата за родова еднаквост продолжува и нема да престане до исполнување на целта

Министерката за труд и социјална политика, Јагода Шахпаска денеска учествуваше на он лајн состанок со кој се означи почетокот на  неколку дневните  обуки кои имаат за цел  градење на капацитетите на одговорните институции, задолжени за  имплементација на новиот Закон за спречување и заштита од насилство врз жените и семејно насилство.

Обуката се спроведува во рамки на проектот Поддршка на имплементација на Национален акциски план за Истанбулска конвенција“  финансиран од Министерството за надворешни работи на Холандија, имплементиран од  Министерството за труд и социјална политика на Република Северна Македонија.

„Законот за заштита и спречување од  насилство врз жените и семејното насилство е многу значаен за нас како општество. Тој предвидува мултидисциплинарен пристап, во кој ќе бидат вклучени и други министерства. Министерството за внатрешни работи, како вистински партнер на Министерството за труд и социјална политика. Министерството за здравство кое ќе биде вклучено во првата фронтална линија пружајќи помош на жртвите на насилство,Министерството за образование, затоа што превенцијата и подигањето на свеста за насилството почнува од најраната возраст и оттука влијанието во обрзованието е многу значајно,“потенцираше Шахпаска.

Таа посочи дека  никогаш не се доволни алатките,  инструментите,  човечките ресурси кои што треба да ги ангажираме за да можеме да се справиме со насилството и оттука ваквите активности, како започнувањето со обука на лца кои што ќе можат да пружаат поддршка во делот на превенција од насилството,претставува многу значаен чекор во ефикасна примена на законот .

Амбасадорот на Кралството Холандија во земјава истакна дека на патот кон членството во ЕУ најважно е да се создаде општество каде сите граѓани ќе имаат еднакви права и ќе се третираат еднакво. Владеењето на правото, еднаквоста пред законот, вклучително и правата на жените, е најголем приоритет за Холандија во Република Северна Македонија. Ја потенцираше потребата од професионалци во повеќе сектори  за спроведување на Законот спречување и заштита од насилство врз жените и семејното насилство и посебно ја исткна улогата на социјалните работници како особено важна во спроведувањето на Законот .

Министерката Шахпаска изрази  благодарност на Кралството Холандија, како  долгогодишен пријател, особено во сферата на испорачување на демократските вредности, во сферата на човековите права, за подршката што ја дава, за започнување со овие обуки, кои симболично се поклопија со  8 март како Меѓународен ден на жената.

„Борбата  продолжува и  нема да престане до исполнување на целта“ ,порача министерката Шахпаска.