Министерката за одбрана Радмила Шекеринска денеска е во посета на општина Струга каде ќе има средби со граѓани, и ќе одржи трибина.

Во изјава за медиумите Шекеринска рече дека граѓаните на Република Македонија 27 години по првиот референдум имаат историска одговорност и шанса да ги отворат вратите Македонија да стане просперитетна држава, членка на ЕУ и НАТО, дел од најмоќните и најпросперитетните семејства во светот. Таа посебно им се обрати на младите, да ја искористат шансата на референдумот, бидејќи одлучуваат за сигурна иднина за себе.

– Ова е шанса младите да растат со еднакви можности како нивните врсници во Европа. Да живеат во држава со повеќе шанси за образование, не само во Македонија туку и во Европа, подобро здравство, повеќе и подобро платени работни места – рече Шекеринска.

Министерката рече дека примерите од соседството најдобро покажуваат колку се зголемуваат можностите со членството во ЕУ и НАТО – во Бугарија неколкукратно се намали невработеноста, во Романија тројно се зголемија платите, во Црна Гора за 6 месеци има два и пол пати повеќе инвестиции во споредба со периодот кога не беше членка на НАТО.

– Ова се шансите кои стојат пред младите и сигурна сум дека ќе ги искористат. Но ова е обврска и за мојата генерација и за повозрасните, да направиме се, да не ги оставаме старите проблеми на нашите деца. Нашите деца и внуци да живеат во подобра држава, која што ќе биде дел од европското семејство – рече министерката.