Израелската војска соопшти дека околу дваесет ракети биле истрелани од Либан, од кои пет кон централен Израел и 15 кон северниот дел, како и дека се направени обиди за проектилите да се пресретнат
Сирените за воздушен напад денеска се огласија во Тел Авив, откако Хезболах соопшти дека ја бомбардирал областа Нирит во предградијата на градот со проектили, пренесе Гардијан.
Израелската војска соопшти дека околу дваесет ракети биле истрелани од Либан, од кои пет кон централен Израел и 15 кон северниот дел, како и дека се направени обиди за проектилите да се пресретнат.
Засега нема извештаи за повредени.
Фрагменти од пресретнувачите паднале во северниот израелски град Мааган Мајкл, предизвикувајќи штета на зграда, како и на возила, јавија израелските медиуми, повикувајќи се на полицијата.
Хезболах соопшти дека ја гаѓал базата Глилот на воената разузнавачка единица 8200 лоцирана во предградијата на Тел Авив. Од таму соопштија дека цел била и поморска база во близина на Хаифа.
Во меѓувреме, американскиот државен секретар Ентони Блинкен, пристигна во Тел Авив на своето единаесетто патување на Блискиот Исток откако Израел ја започна војната во Газа во октомври минатата година, а по нападот на Хамас од 7 октомври.
Блинкен ќе се сретне со израелскиот премиер Бенјамин Нетанјаху. САД се надеваат на напредок, иако се мали шансите за прекин на огнот во Газа за време на неговото патување.
Извор: МЕТА
ПУБЛИКУМ Вистината на прво место
