Скапата храна ги испразни џебовите на граѓаните

Порастот на цените на храната во февруари дополнително ги испразни џебовите на граѓаните. Потврда за тоа се најновите пресметки на синдикатите, кои покажуваат дека минималната синдикална кошница за февруари се искачила над 1.000 евра и изнесува 63.773 денари. Таа е за 521 денар повисока отколку во јануари кога според пресметките изнесуваше 63.252 денари. Со изнајмен стан од 60 квадратни метри, трошоците на едно семејство рипаат до 79.148 денари.

Сите пари за храна и облека

Според пресметките на Сојузот на синдикати на Македонија (ССМ), од минималната синдикална кошничка едно четиричлено семејство за храна и пијалаци треба да одвои  23.427 денари или 36,7 отсто. Покрај храна, за облека и обувки се неопходни 5.800 денари или 9,1 отсто, за станарина, вода, електрична енергија и греење – 6.096 денари или 9,6 отсто. За лична хигиена и одржување на хигиена во домот треба да се одвојат 2.195 денари или 3,4 отсто, за здравје 1.135 денари или 1,8 отсто, за транспорт 4.844 денари или 7,6 отсто.

За рекреација и култура остануваат 4.592 денари или 7,2 отсто, за образование 7.036 денари или 11 отсто, за ресторани и хотели 4.131 денари или 6,5 отсто, а за останати стоки и услуги 1.100 денари или 1,7 отсто. На оние коишто живеат под кирија, потребни им се дополнителни средства – околу 21.470 денари.

Контроли и мерки

Откако на 15 јануари истече владината мерка со која требаше да поевтинат 1.178 производи за 10 проценти за време на новогодишните празници, очигледно е дека цените на основните производи повторно рипнале нагоре. Владата најави нова пресметка на минималната кошничка, но и нови мерки коишто ќе траат до 30 април, а со кои се ограничуваат маржите на 102 групи на производи или над 1.000 прехранбени и непрехранбени производи.

Од Државниот пазарен инспекторат информираат дека нивните инспектори се на терен и ќе вршат контроли дали се почитуваат одлуките на Владата за ограничување на маржите и за замрзнување на цените на прехранбените производи. Согласно Законот за трговија и Законот за заштита на потрошувачите, глобите за непочитување на овие две одлуки се движат од 500 до 10.000 евра, а сите неправилности може да се пријават на 191 или на www.dpi.gov.mk.

Синдикатите бараа почесто да има мерки со коишто ќе се заштити стандардот на граѓаните, но за нив да не бидат информирани трговците, за да се спречат злоупотреби.