Скопје и денес е најзагадениот град во Европа според „IQ Air“

Скопје утрово повторно е најзагаден град во Европа, покажуваат моменталните податоци на платформата „IQ Air“.

Со Индекс на квалитет на воздухот од 169, воздухот во македонскиот главен град е оценет како нездрав. Бројот на ПМ 2,5 честички изнесува 80,5 микрограми на метар кубен.

Покрај тоа што е најзагаден град во Европа, Скопје утрово е и на седмото место по загаденост во светот.

Пред него се градовите Лахор (Пакистан), Делхи (Индија), Ханои (Виетнам), Катманду (Непал), Чонгкинг (Кина) и Дака (Бангладеш).

Следен европски град со најголемо аерозагадување денеска е Приштина (Косово) каде квалитетот на воздухот, исто така, е оценет како нездрав, со индекс на загадување од 158. Приштина се наоѓа на 13-тото место по загаденост во светот.

И оваа зимска сезона Скопје често доминира меѓу најзагадените градови во Европа и светот, според „IQ Air“.

Во декември во главниот град се одржаа два протеста против аерозагадувањето. Граѓаните побараа итно системско справување со загадениот воздух, преку имплементација на ефикасни мерки кои ќе го заштитат здравјето на граѓаните.

Извор: МЕТА