Скопски „Водовод“: Поправката на дефектот се очекува да трае до 15 часа

Јавното претпријатие „Водовод и канализација“ – Скопје претпладнево го испрати првото соопштение со детали за најавената санација на дефектите во градскиот водовод.

Од претпријатието велат дека во текот на утрешниот ден се предвидени активности за санација на „децениски задоцнета модернизација на главниот градски водовод“.

Додаваат оти е изготвен оперативен план со кој се предвидува прецизна постапка за овој зафат со цел „брзо и ефикасно завршување на ваквиот потфат“.

„Главна цел на овој Оперативен план е подобрување на водоснабдувањето и притисокот во Општина Ѓорче Петров и Карпош, со репарација на 6 сегменти каде во изминати децении се нотирани огромни загуби на вода“, стои во соопшението на ЈП „Водовод и канализација“.

Од таму информираат дека со затворање на Главниот градски цевковод Ф1600мм поради санација на 5 затворачи по должина на оваа линија, на потегот од кружниот тек во Ѓорче Петров до раскрсницата на булевар Партизански одреди со ул. Никола Парапунов, ќе се изврши: замена на нефункционален затворач Ф 400мм на кружен тек во Ѓорче Петров;репарација на затворач Ф600мм на мост Обединети нации кој тече; заптивање на затворач Ф700мм на булевар Партизански Одреди кој протекува и замена на затворач Ф150 кој се наоѓа во истата шахта; санација на затворач Ф700мм и Ф500мм на ул. Никола Парапунов и замена на 4 воздушни вентили.

„Согласно Оперативниот План за санација на затворачите на градска водоводна линија Ф1600мм, Сектор Водовод презема бројни оперативни активности за подготовка на луѓе, механизација, алат и пумпи. Во процесот на активности Сектор Водовод првично ќе направи проверка за исправноста на воздушните вентили, испусти и хидранти поставени по должината на цевководот Ф1600мм. По утврдување на состојбата и констатирање на нивната исправност Сектор Водовод со екипи составени од 6 пункта носители на работата со обезбедена испомош на конкретни работници од други пунктови ќе обезбеди сигурно празнење и полнење на системот“, велат од јавното претпријатие.

Акцијата е предвидена за утре, сабота, 21 декември, со почеток во раните утрински часови, додека нема потврда на неофицијалната информација дека водоснабдувањето ќе биде прекинато вечерва во 22 часот.

Според „Водовод“, се очекува операцијата да заврши за помалку од 15 часа, при што, велат дека најмногу време се одвојува за празнење и полнење на магистралниот водовод.

Од претпријатието апелираат да се внимава во изнесувањето информации и да не се предизвикува страв и паника кај граѓаните за „неколку часовното немање вода“.

„Овој сериозен зафат се презема за да се превенираат состојби на дефекти како што се тие во Тетово, Битола, Штип и Неготино, каде со денови и недели немаше вода поради несанирани дефекти“, велат од скопски „Водовод и канализација“.