Со поставувањето транспаренти ВМРО-ДПМНЕ го крши Изборниот законик – кој ќе одговара за тоа?

Во пресрет на завчерашното доаѓање на Никола Груевски во Прилеп, на булеварот „Маршал Тито“ осамнаа транспаренти со носителот на листа на коалицијата на ВМРО-ДПМНЕ во ИЕ 4. Транспарентите беа прикачени на кабли поврзани на електичните столбови од двата краја на булеварот, кои ги поставуваше фирмата „Електроточила Инжинеринг“ ДООЕЛ Прилеп, позната по големиот број добиени тендери од Општина Прилеп. После реакцијата на ОО на СДСМ Прилеп упатена до МВР – ПС Прилеп, денес истите беа отстранети од фирмата која што и ги постави.

Очекуваната валкана кампања на ВМРО-ДПМНЕ започнува токму во центарот каде двајцата политички противници, Заев и Груевски, ги одмеруваат силите во изборната кампања. Ова е само потврда дека ВМРО-ДПМНЕ нема намера да ги почитува законските обврски предвидени со чл.78-а од Изборниот законик и упатството за постапување по истиот член донесено од ДИК, туку ќе ги искористи сите можности кои и’ стојат на располагање преку злоупотреба на имотот на локалната самоуправа и фирми блиски до власта.

Се поставува прашањето дали на ваквиот почеток на валкана кампања од страна на партијата на власт, ОО на СДСМ Прилеп соодветно ќе одговори со тоа што ќе побара одговорност од политичкиот противник? Пред се’ поради фактот што транспарентите се поставени на кабли поврзани за електричните столбови, со што фирмата која ги поставила сторила кривично дело „Загрозување на безбедноста на сообраќајот со опасно дејствие или средство“ од КЗ, со тоа што, како што се гледа од видеото, поставила пречка на сообраќајницата и на таков начин ја загрозила безбедноста на сообраќајот, дело за кое е предвидена парична казна или казна затвор до три години.

Дали ОО на СДСМ Прилеп ќе побара одговорност и од градоначалникот Марјан Ристески затоа што овозможил бесплатно рекламирање на политичката партија ВМРО-ДПМНЕ, спротивно на чл.78-а од Изборниот законик?

Редакција ПУБЛИКУМ