ПУБЛИКУМ Вистината на прво место
Црногорскиот премиер Милојко Спајиќ официјално го презентираше новиот владин план за економски реформи наречен „Евро модел“, кој предвидува драстично зголемување на платите во земјата.
На седница на Владата веќе е усвоен сетот закони кои ќе овозможат овој иновативен модел да започне со примена од јануари 2027 година.
Колку ќе изнесува новата минимална плата?
Според објавениот план, новата минимална плата во Црна Гора ќе биде скалеста и ќе се базира на степенот на образование на вработените:
- За работни места со основно и пониско образование: 1.000 евра.
- За работни места со средно образование: 1.250 евра.
- За работни места кои бараат високо образование: 1.400 евра.
Премиерот Спајиќ потенцираше дека платите ќе растат кај сите – и во приватниот и во јавниот сектор, опфаќајќи над 250.000 вработени. Програмата вклучува и значително намалување на даночното оптоварување на трудот, што ќе им овозможи на вработените со повисоки плати да задржат 92 центи од секое евро кое работодавецот го издвојува, додека кај најниските плати тој сооднос ќе биде дури 97 центи. Како конкретен пример беше наведено дека за сегашна нето плата од 1.600 евра за која работодавецот издвојува 1.980 евра, со новото даночно растоварување работникот ќе добива 1.870 евра.
Раст на пензиите и нови даночни политики
Владината реформа не ги изоставува ниту пензионерите. Спајиќ најави дека од 2027 година пензиите ќе се усогласуваат четири пати годишно за да го следат растот на платите. Се очекува просечната пензија во април таа година да надмине 600 евра, додека минималната ќе ја надмине границата од 500 евра. Како дополнителна поддршка, веќе во декември оваа година сите пензионери ќе добијат бонус од 100 евра за претстојната зима.
Одговарајќи на прашањето како ќе се финансира оваа амбициозна реформа, премиерот појасни дека покритието доаѓа од неколку клучни извори:
- Раст на потрошувачката и зголемување на вработеноста.
- Сузбивање на сивата економија и очекувано враќање на црногорската дијаспора.
- Воведување активни даночни мерки, меѓу кои и посебен данок на празни терцијарни недвижности, односно куќи и станови кои сопствениците ги држат затворени додека младите се соочуваат со високи кирии.
- Ефикасно одземање на противправно стекнат имот преку борба против организираниот криминал и корупцијата.
Според проекциите на црногорската Влада, со имплементацијата на „Евро моделот“, просечната нето плата во земјата за многу кратко време ќе скокне од сегашните 1.000 на над 1.400 евра, надминувајќи го просекот во неколку држави-членки на ЕУ како Грција, Бугарија, Романија и Унгарија.
Следете ги најновите економски случувања во регионот во рубриката „Балкан“ на Публикум.
