спасовски мвр

Спасовски: Група испраќала лажни дојави за бомби и ќе добијат кривични пријави за тероризам

Набрзо група македонски државјани ќе добијат кривични пријави за тероризам и ќе одговараат за лажните дојави за бомби во училиштата и други објекти, вели министерот за внатрешни работи Оливер Спасовски во неделното интервју на Радио Слободна Европа. Коментирајќи ги обвинувањата на опозицијата дека фаворизира одредени криминални групи, Спасовски тврди дека нема селекција во борбата против криминалот.

Господине Спасовски, веќе некое време дојавите за бомби ги снема или барем јавноста не е информирана за нови закани. Дали се уште пристигнуваат сомнителни меилови од VPN адреси од Русија и Иран?

За нас беше многу важно безбедноста на граѓаните, учениците на наставниот кадар да биде на највисоко можно ниво и во тој дел апсолутно не е променето ништо со протоколите, значи безбедноста мора да се сочува на едно високо ниво. Веќе поднесовме една кривична пријава против еден малолетник и практично навлегуваме во една група на лица коишто учествувале во праќањето на дојавите по електронски пат и токму користењето на VPN адреси итн и сме во позиција за која за многу скоро време целата таа група ќе биде комплетно разоткриена, ќе бидат поднесени кривични пријави за делото тероризам. И ова како појава нас ни овозможи практично да направиме и промени во делот на протоколите за постапувањето.

Што е тоа што сега го правите, а што не можевте порано да го преземете за да ги избегнеме и стресовите на родителите и губењето на часови на учениците?

За секоја работа треба да има добра подготовка. Требаше повеќе време за да ги видиме праксите за да заседава Советот за координација на безбедносните служби за да може оперативниот тим коишто се формираше да изработи предлог вакви мерки да се достават тие во МВР да се изработи целиот тој пакет на протоколи и да бидат донесени. Индикативно е како од моментот на донесувањето на новите протоколи од утредента имаме сериозно намалување или престанување на дојавите. Тоа само укажува дека интензивно се работеше не само кон подготовка на процедурата, туку и во делот на истрагите. И ние само ја детектиравме таа криминална група која се занимаваше со ваквите дојави, за голем дел од дојавите за поголем временски период и за повеќе институции во коишто беа дојавите. Секако дека постои и другата тенденција, а тоа е геостратешките интереси коишто се испреплетуваат во државата.

Се работи за македонски државјани, групата којашто ја споменувате?

Да, како што реков поднесовме кривична против едно лице малолетник, но се работи и на една друга група коишто меѓусебно се поврзани во однос на дојавите.

Но, не се само лажните бомби. Ни се случија неколку сајбер напади врз интернет страниците на државни институции и министерства. Дали некоја од тие истраги заврши и што правите за да превенирате такви напади во иднина?

Истраги се водат за сите овие институции во коишто имаше хибридни напади. Има сериозен напредок, се добиваат податоци и информации. Самиот факт дека треба овие податоци да ги обезбедиме преку меѓународна правна помош говори и за тоа дека треба да има подолго време од овој аспект.

Во последниот период гледаме полициски акции со апсења и приведувања за дрога. Имате ли сознанија колку пари се вртат во наркобизнисот и колку всушност дрогата им е достапна на младите?

Таа војна којашто ја води Министерството заедно со Јавното обвинителство резултира со многу случаи во коишто имаме не само детектирано туку и разбиено криминални групи и банди коишто се насочени кон продажба на дрога. Ние практично овој месец имавме оперативна активност на територијата на целата држава, токму на сузбивањето на уличното дилерство на дрога. Знаете за акцијата „Безбедно лето“ којашто даде извонредни резултати во делот на намалување на криминалитетот, сега одиме со втора акција „Безбеден град“ којашто е насочена токму кон тие криминални структури и групи и тука интензивно ќе работиме со цел мирот и спокојот на граѓаните бидат на едно високо ниво.

Го спомнавте „Безбеден град“. Но токму за оваа акција опозицијата Ве обвинува за штитење на одредени криминални групи. Дали безбедносно ризични лица добиле дозволи за оружје по скратена постапка?

Такви глупости коишто се изнесуваат во јавноста не соодветствуваат со никаква реалност. Вие не можете во исто време да имате борба против криминални структури и да заштитувате некого. И за припадниците на македонската полиција воопшто не е важно кој на која група припаѓа. Така да, знам јас за средби коишто биле одржани со највисоките претставници на опозицијата со дел од овие криминални структури, веројатно мислејќи дека на тој начин ќе може да се помогне во некој друг аспект и тие активности апсолутно не смеат да се во насока на политичка поддршка на кој било криминалец во државата. Најголем дел од тие криминални структури се наоѓаат на издржување на казна затвор, а за сите други криминални структури коишто се занимаваа со рекет, закани и уцени интензивно продолжува борбата против секој еден од нив.

Промената на регистарските таблички на автомобилите со нова ознака НМК, која произлегува од Преспанскиот договор, ќе ги чини граѓаните 11 милиони евра. Зошто наместо нови регистарски таблички оваа обврска не се исполни на друг начин. На пример со налепници врз постоечките таблици?

Имаме ние формирано веќе работна група во МВР којашто работи токму на овој аспект бидејќи разговаравме и со министерот за транспорт и врски, имаме комуникација преку МТПС со „Макамтранс“ затоа што промената подразбира и промена во документацијата, дозволите итн и за мене е најважно што може да се помогне за сите. Знаеме дека обврската е до наредната година да бидат променети табличките како што впрочем е и со документите и ние мислам дека за многу кратко време ќе имаме решение коешто би било поволно за граѓаните. Јас така барем се надевам и очекувам со тоа што од друга страна ќе мора да се стават и норми на строги казни за сите оние коишто нема да го почитуваат тоа како решение. Мора да направиме комбинација којашто ќе биде од интерес на граѓаните меѓутоа и да имаме сериозна одговорност.

Значи граѓаните да не брзаат со промена на табличките?

Така да налепниците се една од опциите, меѓутоа кога ќе се донесе одлуката и решението ќе ги соопштиме на граѓаните. Секако дека нас ни е најважно да бидат задоволни граѓаните.

Господине Спасовски дали имате политички амбиции да бидете претседателски кандидат на следните избори?

Јас нема да бидам во политиката ако немам политички амбиции и сум долго време тука, меѓутоа политичките амбиции на еден политичар не значат амбиции за остварување на лични цели. Моите политички амбиции се да ги оствариме целите на државата. Исто како кога како премиер бев дел од потпишувањето на протоколот за членството во НАТО или подигањето на македонското знаме пред НАТО. Следната цел која силно ја посакувам е токму членството во ЕУ, да бидеме дел од големото европско семејство, да дадеме сериозна шанса на младите луѓе, тие коишто ќе бидат тука и ќе ја градат Северна Македонија. Така што, тие се моите цели. За личните цели мислам дека ниту е време, ниту има простор сега да разговараме затоа што државата и граѓаните се пред сѐ.

Извор: Радио Слободна Европа

Прочитајте повеќе

Одбележана 4-годишнината од членството на Северна Македонија во НАТО (Видео)

Во Министерството за одбрана, денеска со свечена церемонија на која се обратија првиот вицепремиер за …