ПУБЛИКУМ Вистината на прво место
Македонскиот народен театар (МНТ) со претставата „Страв и надеж“ (во режија на Татјана Мандиќ Ригонат) ја освои наградата за најдобра претстава на јубилејното 60. издание на фестивалот „Војдан Чернодрински“ во Прилеп.
Жирито, во состав Снежана Коневски Руси, Дарко Лукиќ и Аида Буквиќ, одлучи наградата за најдобра режија да му припадне на Дејан Пројковски за поставувањето на „Црнила“. Според претседателката на жирито, „Страв и надеж“ е комплетна претстава, додека членот Лукиќ додаде дека кај претставата на МНТ највпечатлива била компактноста на сите сегменти.
Пет признанија за прилепската „Црнила“
Најголем број награди, вкупно пет, заминаа кај екипата на „Црнила“ во изведба на домашниот Народен театар „Војдан Чернодрински“ од Прилеп.
Ова се најзначајните лауреати на 60. издание:
- Димитар Ѓорѓиевски: Награда за главна машка улога за ликот на Фезлиев во „Црнила“.
- Слаѓана Вујошевиќ: Награда за главна женска улога за Констанца во „Амадеус“.
- Биљана Драгиќевиќ Пројковска: Награда за женска епизодна улога во „Мачкина глава“.
- Александар Степанулески: Награда за машка епизодна улога во „Мачкина глава“.
- Јеткин Сезеир и Сара Спиркоска: Награди за млад актер и млада актерка.
- Валентин Светозарев и Марија Пупучевска: Награди за сценографија и костимографија за „Црнила“.
- Ирена Поповиќ Драговиќ: Награда за музика за „Страв и надеж“.
Жирито оваа година одлучи да не додели четири награди, меѓу кои и онаа за современ драмски текст, испраќајќи порака до театрите да се занимаваат со македонските автори многу повеќе.
Наградите на лауреатите ќе им бидат врачени вечерва во 19 часот. Веднаш потоа, во 20 часот ќе настапи Београдско драмско позориште со претставата „Црно злато“ од Дејан Дуковски, во режија на Оливер Фрљиќ.
Следете ги најновите вести од културата во рубриката „Магазин“ на Публикум.
