Студентите во Србија се кренаа: Блокирана зградата на Претседателството додека се обраќаше Вучиќ

Илјадници студенти и активисти се собраа синоќа околу зградата на Претседателството на Србија за да го изразат своето незадоволство за време на говорот на српскиот претседател Александар Вучиќ, пишува дневниот весник Данас.

За да може претседателот Вучиќ да ја напушти зградата на Претседателството полицијата формирала простор со штитови. Претседателката на Собранието Ана Брнабиќ беше испратена од толпата со врева и свирежи. Тие направија круг околу зградата за да ги спречат функционерите да го напуштат Претседателството. На воки-токи, командантот зборувал „без употреба на средства за принуда“, јавува репортерот на Данас.

Претходно, додека од Претседателството пред медиумите зборуваше претседателот на Србија, Александар Вучиќ, во преносот се слушаа свирежите на студентите. Во обраќањето до медиумите од Претседателството, Вучиќ рече дека ги почитува и цени сите што вечерва протестираат, но дека со овој собир се покажало дека протестите се политички.

За, како што наведоа, да бидат погласни од претседателот, студентите направија заглушувачка атмосфера и со извикување „Сите на блокади“, како и со свирење, извикуваа „рацете ви се крвави“ и „не сме платеници“ пред зградата на Претседателството. Сообраќајот е во прекин на улиците Краљ Милан и Кнез Милош.

„Немаше да ја има оваа крв да беше сè по закон“, „Ќе го решиме и овој систем“, „Ако го скратите образованието – што ќе остане“, „Студентите не се платени “, „Гравитацијата не е виновна“, „Нема наука додека рацете ви се крвави“, „Студентите на блокада, работниците во штрајк“ – ова се дел од натписите на транспарентите на студентите.

Носејќи индекси и транспаренти, тие свиркаат, извикуваат „рацете ви се крвави“, но бараат и апсење на одговорните за падот на настрешницата на железничката станица во Нови Сад, кога животот го загубија 15 лица.

Тие го повикуваат Вучиќ да излезе надвор и извикуваат „Студентите се кренаа“. Зголемено е и присуството на полицајци во цивилна облека, јавува репортерот на Данас.

Претседателот на Србија го заврши своето обраќање, а претседателката на Собранието Ана Брнабиќ излезе од зградата на Претседателството и беше исвиркана и испратена со огромна врева.

Околу 40 државни факултети на четири универзитети во Србија официјално се под блокада, а студентите денеска им оддадоа почит на жртвите од трагедијата во Нови Сад блокирајќи ги патиштата петнаесетина минути. На блокадите се приклучија и студентите на Бизнис школата во Нови Сад, Електронскиот во Ниш и Природно-математичкиот факултет во Крагуевац, а истото го најавија и студентите на Медицинскиот факултет во Нови Сад. Студентите бараат објавување на целосна документација за реконструкцијата на Железничката станица во Нови Сад, како и откривање на одговорните за нападот врз студентите на ФДУ. Студентите добија поддршка од Универзитетот во Белград, бројни професори, активисти, земјоделци и политички партии, како и граѓани.

Пред нешто повеќе од две недели студентите почнаа да ги блокираат факултетите, а оттогаш секојдневно се приклучуваат нови факултети низ цела Србија. На Универзитетот во Белград 25 од 31 факултет влегоа во блокада, на Универзитетот во Нови Сад речиси сите факултети се блокирани. Студентите на Медицинскиот факултет најавија дека денеска ќе се приклучат на блокадите, додека Факултетот за спорт и физичка култура не е во блокада.

На Универзитетот во Ниш, кој има 13 факултети, досега се блокирани три – Филозофскиот, Природно-математичкиот и Факултетот за уметности. На Универзитетот во Крагуевац, студентите на Крагуевачкиот Филолошки и Уметнички факултет од петок, 6 декември го блокираат Ректоратот на Универзитетот, а во блокирањето на нивниот факултет им се придружија и нивните колеги од Факултетот за технички науки (ФИН).

Извор: МЕТА