Судењето за убиството на Вања Ѓорчевска и Панче Жежовски одложено за 20 септември

Судењето за двојното убиство на 14 годишната Вања Ѓорчевска од Скопје и 74 годишниот Панче Жежовски од Велес, требаше да започне денеска, но истото беше одложено за 20 септември. Судењето е одложено бидејќи Основниот кривичен суд Скопје одлучил да ги спои двете обвиненија во еден предмет.

Вања беше пријавена за исчезната на 27 ноември 2023 година. На 3 декември беше пронајдено и безживотното тело на велешанецот Панче Жежовски. Во случајот за двојното убиство обвинети се вкупно пет лица. Првично беше поднесено едно обвинение против четворица од осомничените, за кои денеска требаше да почне судскиот процес, а во него го немаше првоосомничениот Љупчо Палески – Палчо бидејќи беше во бегство.

Тој беше фатен и екстрадиран од Турција, по што Обвинителството поднесе обвинение и за него. Четворицата соучесници на Палчо, меѓу кои е и таткото на девојчето Вања, Сашо Ѓорчевски, како и штипјанецот Влатко Кешишов и велешаните Велибор Манев и Боре Видевски кои биле соучесници во делата, утрово беа во судот во Скопје.

На 4 декември лани, притвор доби и петтоосомничениот Александар Ѓорчевски, татко на Вања Ѓорчевска од Скопје. Од она што го кажале осомничените, како што изјавија од МВР и од обвинителството, таткото им давал информации на останатите за тоа каде и кога излегува неговата ќерка за на училиште и дека токму тој ден, на 27 ноември, ќе оди на училиште сама, без нејзината помала сестра, која го губела првиот час во ОУ „Песталоци“.

Ученичката од 9 одделение, Вања, на 27 ноември била грабната во влезот од зградата каде што живее, околу 7.30 часот изутрина. Таа е земена со возило „Цитроен“, во сопственост на исчезнатиот, а сега пронајден починат велешанец Панче Жежовски. Заедно со цитроенот, се движело уште едно возило – „Рено кангу“. Возилото „Цитроен“ било запалено во скопското село Бразда, истиот ден кога е грабната Вања, на 27 ноември. Девојчето, само 2,5 часа откако било грабнато, според предистрагата, било убиено со пиштол и потоа закопано, исто така во близина на селото Бразда. Оружјето сè уште не е пронајдено.

Извор: МЕТА