Судскиот совет не се дава – бара да престанат притисоците

Судскиот совет, по најавите за интерпелација и повиците до членовите самите да дадат оставки од функцијата, бара да престанат притисоците врз нив. Тие оценуваат дека секој обид за поткопување на независноста на судската власт преку притисок против членовите на Судскиот совет и судиите претставува директна закана за независноста и демократијата на државата и владеење на правото во Северна Македонија.

Ова тело коешто изминативе месеци е во фокусот на јавноста, по бројните внатрешни турбуленции, но и по најавите на премиерот Христијан Мицкоски дека е потребно негово распуштање, изразува загриженост бидејќи смета дека пораките кои се испраќаат во јавноста од страна на функционерите се одразуваат на нивниот интегритет и директно влијаат врз перцепцијата и довербата на граѓаните за нивната работа.

„Во секоја правна држава независноста на судската власт е еден од основните столбови за гарантирање на законитоста, правдата и заштита на правата и слободите на граѓаните.Членовите на Судскиот совет и судиите мора да бидат ослободени од каква било форма на притисок и влијание, за да можат да одлучуваат самостојно и независно“, се вели во реакцијата.

Апел да престане притисокот

Судскиот совет упатува апел до сите носители на јавни функции, во своето работење и делување доследно да ги почитуваат Уставот, законите и меѓународните договори ратификувани согласно Уставот, со цел владеење на правото и враќање на довербата кај граѓаните во системот.

Владејачката коалиција започна процес за носење на нов закон за Судски совет, кој треба да биде донесен до јуни годинава. Во меѓувреме ВМРО-ДПМНЕ и ЗНАМ поднесоа интерпелација во Собранието против петмината членови на Судскиот совет кои се избираат во парламентот. Станува збор за судиите Весна Дамева, Миљазим Мустафа, Тања Чачарова-Илиевска, Павлина Црвенковска и Селим Адеми.

Советот е составен од 15 члена, од кои осум члена ги избираат судиите од своите редови, петмина ги избира Собранието од кои двајца на предлог на претседателот на државата. По функција членови на Советот се претседателот на Врховниот суд и министерот за правда, кои учествуваат во работата на Советот без право на глас. Мандатот на избраните членови трае шест години со право на уште еден избор.