Судскиот совет застана зад одлуката на тетовскиот суд

Судскиот совет и судии од Тетово застанаа зад одлуката на нивниот колега Елмедин Ферати кој му одреди две години затвор на возачот Менсур Пајазити поради прегазувањето на 22-годишната Теодора Ристовска од Тетово. Случајот предизвика бројни бранувања и реакции на јавноста во Северна Македонија, поради што премиерот Христијан Мицкоски и Министерството за правда побараа вклучување на Судскиот совет за да се разгледа пресудата.

Судскиот совет информираше дека го разгледале предметот за сообраќајката во која загина младата Теодора од Тетово и се на мислење дека судијата Ферати не можел да досуди повисока казна. Според нив, ако е изјавена жалба само во корист на обвинетиот, пресудата не смее да се измени на негова штета во однос на правната оцена на делото и на кривичната санкција.

Претходно реагираа и од подружницата на Здружението на судии, при Основниот суд во Тетово, кои изнесоа став дека Ферати донел законита одлука. Тие апелира до сите чинители во општеството да се воздржат од неоправдани коментари и да не се користи ова пресуда за неосновани напади на судиите, стигматизирање и јавен линч на судиите кои постапувале во конкретниот предмет, заради постигнување други цели.

Семејството за загинатата Теодора Ристовска во отворено писмо соопшти дека очекува и се надева дека Судскиот совет адекватно ќе постапи во врска со „скандалозната одлука“.  Тетовскиот судија Елведин Ферати, во понеделникот го осуди обвинетиот Менсур Пајазити на две години затвор за сообраќајката којашто се случи пред речиси три години.