Support Kocani: Обезбедени медицински креми од 1 милион денари за настраданите од пожарот

Граѓанската иницијатива Support Kocani продолжува со својата континуирана хумана мисија за помош на лицата кои настрадаа во катастрофалниот пожар.

Со дел од преостанатите средства од собраните донации, иницијативата реализираше набавка на специјализирани медицински креми за третман и нега на погодените граѓани.

Вредна донација за регенерација и заштита на кожата

Вкупната вредност на оваа набавка изнесува 1.023.871 денари. Во рамките на истата, за настраданите се обезбедени 300 креми Bioderma SPF 50, 300 креми Cicatrix и 150 сетови од брендот La Roche-Posay. Овие медицински препарати се специјално наменети за заштита, регенерација и подобрување на состојбата на кожата кај лицата кои се здобиле со изгореници.

Од граѓанската иницијатива информираат дека набавката е реализирана во директна комуникација со засегнатите лица и е направена исклучиво согласно нивните реални потреби. Главната цел е да се обезбеди соодветна и навремена поддршка во нивниот процес на закрепнување.

Каде можат да се подигнат препаратите?

Средствата за оваа голема набавка се обезбедени преку донации од граѓани и компании. Дополнително, дел од процесот е реализиран со поддршка од самите аптеки кои овозможиле значителен попуст при купувањето на медицинската козметика.

Сите лица на кои им се потребни овие препарати за третман на изгорениците, ќе можат да ги подигнат од просториите на младинскиот центар „Гнездо“ во Кочани.

Оваа поддршка претставува уште еден силен доказ дека солидарноста и заедништвото ја покажуваат својата вистинска сила токму тогаш кога се најпотребни. Од Support Kocani порачуваат дека остануваат целосно посветени на помошта и грижата за сите засегнати лица, сè додека за тоа постои потреба.

Прочитајте ги најновите вести од државата на Публикум.