ПУБЛИКУМ Вистината на прво место
Пратеникот на СДСМ, Миле Талевски, упати остри критики кон министерот за земјоделство Цветан Трипуновски за време на собраниската седница посветена на неговата интерпелација. Тој го обвини министерот за целосен распад на системот, намалена поддршка за земјоделците и сериозни корупциски скандали.
„Пред нас овде не е интерпелација само заради него, туку интерпелација во којашто се отсликуваат катастрофалните состојби во овие две години коишто ги направија Цветан Трипуновски и неговиот ментор Христијан Мицкоски“, нагласи Талевски, додавајќи дека актуелното раководство направило вистински пустош во земјоделството.
Корупциски скандали и суспендиран ИПАРД 3
Талески особено се осврна на неодамнешните корупциски афери кои ги тресат клучните институции во земјоделскиот сектор, оценувајќи ги како системски проблем.
Тој потсети дека еден директор бил фатен како прима поткуп од 100.000 евра (при што биле пронајдени 50.000 евра во кеш), додека друг барал поткуп од 50.000 евра за доделување средства од ИПАРД програмата.
Како директна последица на овој хаос и корупција, Талевски посочи на следните поразителни факти:
- Програмата ИПАРД 3 денес е целосно суспендирана.
- Блокирани се дури 128 милиони евра европски средства.
- Во неизвесност се ставени стотици проекти и инвестиции во вредност од околу 130 милиони евра.
Намалени субвенции и изневерени тутунопроизводители
Најголемиот финансиски удар од политиките на Владата го трпат тутунопроизводителите. Според пратеникот на СДСМ, власта ги намалила субвенциите за тутунот од 100 на 80 денари, наспроти нивните ветувања дадени во опозиција за сума од 160 денари по килограм.
Дополнително, над 14.000 семејства сè уште ги чекаат своите пари, иако им било ветено дека исплатата ќе биде реализирана најдоцна до мај. Вкупниот буџет за субвенции во изминатите две години е намален за една милијарда денари.
„Народски кажано, богатите ги правите уште побогати, а сиромашните уште посиромашни. Им земате на малите за да им дадете на големите“, порача Талевски од собраниската говорница.
На крајот од своето обраќање, пратеникот побара лична одговорност и неотповиклива оставка од министерот Трипуновски поради предизборните лаги и колапсот во секторот.
Следете ги најновите политички вести и случувања на Публикум.
