Трамп и Маск ја демонтираат американската развојна помош

Американскиот претседател Доналд Трамп најави отпуштања на вработени од врвот на Американската агенција за меѓународен развој (УСАИД). Агенцијата досега ја водеа „куп радикални лудаци“, рече тој. „Ќе ги избркаме и потоа ќе донесеме одлука.“ Трамп веќе го стопираше поголемиот дел плаќања за развојна помош. Стотици вработени во агенцијата беа отпуштени или испратени на одмор, а десетици раководители добија откази со моментален ефект, објавија неколку американски медиуми.

Новата влада размислува за целосно распуштање на досега независната агенција, која игра важна улога во глобалната развојна соработка. Веб-страницата наеднаш веќе не беше достапна, како и профилот на УСАИД на платформата Х. Агенцијата има годишен буџет од 42,8 милијарди долари (околу 41,9 милијарди евра) и е одговорна за развојна соработка и помош во странство.

Нема помош за Јужна Африка

Трамп изјави и дека сега ќе ја откаже сета идна финансиска помош за Јужноафриканската Република. „Јужноафриканската Република конфискува земја и многу лошо постапува со некои популации. Соединетите Американски Држави нема да го прифатат тоа, ние ќе дејствуваме“, напиша тој на неговата сопствена социјална платформа Truth Social. Исплатата на помошта треба да биде суспендирана додека Јужноафриканската Република не истражи колку лошо се однесува кон „одредени групи на население“, продолжи Трамп, без да даде подетално образложение.

Маск упатува недокажани обвинувања

Човекот од доверба на Трамп, Илон Маск, претходно тврдеше дека УСАИД е криминална организација. „Време е таа да умре“, напиша Маск, кој има огромно влијание во владата и покрај тоа што на хартија има улога на „надворешен советник“ и е без политички мандат. Во друга објава, Маск зборуваше за агенцијата во минато време: „УСАИД беше змиско гнездо на радикални левичарски марксисти кои ја мразат Америка“.

Маск, освен тоа, тврдеше и дека УСАИД користела пари од даночните обврзници за да финансира „истражување на биолошко оружје, вклучително и Ковид-19, кој уби милиони луѓе“. Тој не ги образложи ваквите наводи, кои претходната американска администрација ги поврза со руска кампања за дезинформирање.

Неколку американски медиуми, вклучувајќи ги Си-Ен-Ен и „Њујорк Тајмс“, објавија дека членови на одделот на Маск се обиделе да добијат пристап до доверливи информации во седиштето на УСАИД во Вашингтон. Двајца високи безбедносни функционери одбиле да го сторат тоа и набргу потоа биле пратени на „отсуство“.