Tрамп му се закани на Париз сo царини од 200 проценти

Американскиот претседател Доналд Трамп ѝ се закани на Франција со високи царини за вино и шампањ откако Париз ја отфрли неговата покана за учество во таканаречениот „Одбор за мир“.

„Ќе воведам царини од 200 проценти на неговите вина и шампањ“, рече Трамп во понеделникот (локално време), зборувајќи за францускиот претседател Емануел Макрон. Макрон ќе стане дел од телото кое го покрена Трамп, „но не мора да учествува“, додаде Трамп.

Францускиот министер за надворешни работи Жан-Ноел Баро првично ја одби поканата на Трамп во понеделникот. Франција мора да каже „не“ бидејќи повелбата на овој „Одбор за мир“ оди подалеку од рамките на Појасот Газа, а со тоа и од мировниот план поддржан од Обединетите нации, им рече Баро на пратениците.

Опкружувањето на Макрон, исто така, соопшти дека иницијативата на Трамп покренува прашања, особено во врска со „почитувањето на принципите и структурата на Обединетите нации“. Овие принципи не смеат да бидат доведени во прашање под никакви околности. Франција е постојана членка на Советот за безбедност на ОН.

Во меѓувреме, Трамп во понеделникот потврди дека и рускиот претседател Владимир Путин треба да биде дел од таканаречениот Одбор за мир. „Да, тој е поканет“, рече Трамп.

Трамп сака да создаде тело наречено „Одбор за мир“, со кое тој лично би претседавал, кое треба да биде конкурент на Обединетите нации во решавањето на конфликтите низ целиот свет. Американскиот претседател редовно ги критикува ОН, а месецов најави повлекување на САД од 66 меѓународни организации.

Повеќе земји, вклучувајќи ја и Германија, веќе добија покана да се приклучат на „Одборот за мир“. Портпаролот на германската влада, Штефан Корнелиус, изјави во понеделникот дека сојузната влада, во договор со своите партнери, ќе разгледа како да постапи по таа покана. Тој сè уште не го потврди учеството на Германија.

„Одборот за мир“ првично беше формиран за да ја надгледува обновата во Појасот Газа. Меѓутоа, повелбата на осум страници, на иницијативата не ја споменува конкретно палестинската територија.

За постојано место во „Одборот за мир“ на Трамп, земјите членки треба да платат повеќе од една милијарда долари. Оние кои нема да платат имаат право само на тригодишно место во тоа тело.

Извор: DW