ПУБЛИКУМ Вистината на прво место
Американскиот претседател Доналд Трамп е подготвен да разговара со трговските партнери за олеснување на новите царини за увоз во САД, но под одредени услови. „Сакам да го решам проблемот со дефицитот што го имаме со Кина, Европската Унија и другите земји. Ако сакате да разговарате за тоа, јас сум отворен за дискусии“, изјави Трамп.
Тој вели дека разговарал со многу лидери од Европа, Азија и од целиот свет во текот на викендот. „Тие се желни да склучат договор“, уверува американскиот претседател. Сепак, тој нагласи дека повеќе не е подготвен да прифаќа трговски дефицити – односно нерамнотежа во трговскиот волумен при што една земја извезува значително повеќе во САД отколку што увезува од таму. Мора да има или трговски суфицит за американската страна или избалансиран резултат во меѓусебната трговија, бара Трамп.
Преговори бараат повеќе од 50 земји
Според советник на Трамп, десетици земји сакаат да започнат преговори со Вашингтон. Повеќе од 50 земји ја контактирале Белата куќа за да преговараат за олеснување на царините, изјави за Си-Ен-Ен шефот на Националниот економски совет, Кевин Хасет. Тие држави, според него, сфатиле дека царините во голема мера одат на нивна штета. Хасет тврди дека „не се очекува големо влијание“ за потрошувачите во САД. Ова е во спротивност со оценките на експертите кои очекуваат повисоки цени во САД.
И министерот за финансии Скот Бесент за Ен-Би-Си изјави дека 50 земји сакаат почеток на преговори. Останува да се види „што нудат земјите и дали е тоа веродостојно“, додаде Бесент. Новите царини, според него, се „максимално средство за притисок“ за Трамп.
Кои американски брендови ги бојкотираат Европејците?
На прашањето дали за следната рунда нови царини сè уште може да се преговара и дали нивното стапување во сила може да се одложи, американскиот министер за трговија Хауард Лутник за телевизијата Си-Би-Ес рече: „Нема одложување“. Трамп ги објави тарифите и не го мислеше тоа како шега, вели Лутник, додавајќи дека тие не би исчезнале толку брзо. „Претседателот мора повторно да ја регулира светската трговија“, изјави Лутник.
Падот на берзите продолжува
Во врска со превирањата на берзите по објавувањето на неговиот царински пакет, Трамп рече дека не сака пад на пазарите: „Но, понекогаш мора да земете лекови за да поправите нешто.“
Надолниот тренд на пазарите продолжува со несмалено темпо: Во Азија, берзите изутринава (7.04) повторно забележаа огромни загуби. Минатата недела пад на курсевите на берзите имаше ширум светот.
Земјите од ЕУ разговараат за можните реакции
Министрите за трговија на земјите од ЕУ денеска треба да разговараат за тоа каква стратегија би можела да се примени за Трамп да се убеди да ги повлече неодамна воведените царини. Истовремено треба да се продолжи со подготовки за контрацарини и други можни одмазднички мерки. Тие треба да се воведат доколку обидите за преговори не успеат.
