Трамп утре ќе разговара со Путин

Претседателите на САД и на Русија, Доналд Трамп и Владимир Путин во вторник (18.03) треба да разговараат за ставање крај на војната во Украина, соопшти американскиот претседател. Трамп пред новинарите во претседателскиот авион Air Force One вчеравечер рече дека една од темите за разговор би требало да биде „поделбата на одредени средства“ меѓу Русија и Украина.

Американскиот претседател оцени дека „многу работа“ е веќе завршена. „За многу работи е веќе разговарано со двете страни, Украина и Русија“, рече Трамп. Како конкретни „средства“ тој ги именуваше „земјата“ и „електраните“.

Пратеникот на Трамп, Стив Виткоф, претходно најави скорашна средба меѓу американскиот претседател и Путин. Виткоф, кој се сретна со Путин во Москва пред неколку дена, за Си-Ен-Ен во неделата изјави дека очекува „навистина добар и позитивен разговор“ меѓу двајцата шефови на држави. Во исто време, како што наведе, би продолжиле разговорите со Украина.

Напорите за постигнување прекин на огнот неодамна добија на интензитет откако Украина за време на разговорите со САД во Саудиска Арабија се согласи со американскиот предлог за 30-дневен прекин на огнот. Потоа, САД ја продолжија воената помош за Украина, која беше привремено суспендирана. Русија досега реагираше претпазливо на предлогот и постави услови.

Трамп и Путин веќе разговараа по телефон во средината на февруари. Трамп потоа изјави дека со шефот на Кремљ се договорил „веднаш“ да ги започне преговорите за иднината на Украина. Тој тогаш најави и скорашна средба со Путин во Саудиска Арабија.

Една недела подоцна, делегациите од Соединетите Американски Држави и Русија се состанаа во Саудиска Арабија за првпат од почетокот на руската агресија врз Украина во февруари 2022 година и се согласија на преговори за надминување на разликите и брзо завршување на војната во Украина.