Трамп воведува дополнителни царини за сите земји

Американскиот претседател Доналд Трамп потпиша извршна наредба за воведување нови царини за американските трговски партнери. САД ќе ги воведат овие реципрочни царини заради правичност, рече Трамп на церемонијата на потпишување во Белата куќа. „Тоа е фер за сите. Ниту една друга земја не може да се жали.” Според аргументацијата на Трамп, новите царини имаат за цел да ги изедначат условите за игра меѓу американските производители и странските конкуренти.

Новите царини  нема да стапат на сила веднаш. Наместо тоа, надлежните органи имаат 180 дена да ги идентификуваат погодените земји и, врз основа на тоа, да наметнат царини специфични за земјата, како што изјави висок советник на Трамп. Прво во фокус се земјите со најголем трговски дефицит. При планираните царини не е важно дали се насочени кон стратешките конкуренти како Кина или сојузниците како Европската унија, Јапонија или Кореја. Деталите се уште се разработуваат.

Засегнатите земји се поканети да преговараат со американскиот претседател Трамп со цел да се избегнат американските царини. Царините исто така би можеле да стапат на сила пред крајниот рок, истакна советникот.

Таканаречените реципрочни царини во основа значат дека  САД ги зголемуваат царините секаде каде што моментално наплаќаат помалку од своите трговски партнери. Трамп во минатото нагласи дека сака да ги искористи овие царини за да ја поправи трговската нерамнотежа и ги обвини другите земји дека неправедно се однесуваат кон САД.

Експертите претпоставуваат дека САД би биле најтешко погодени од далекусежните компензаторни царини доколку тие навистина стапат на сила – и не се избегнат однапред во преговорите. Американските компании веројатно ќе ги пренесат повисоките трошоци на потрошувачите – што ќе ја поттикне инфлацијата.  Доналд Трамп   секогаш одново се потпира на царините.  Тој ги користи и како казнена мерка и како средство за притисок за постигнување политички успех во преговорите со други земји.

Белата куќа јасно стави до знаење дека е насочена и кон други трговски бариери. Тие вклучуваа даноци на американски компании, даноци на продажба, владини субвенции или регулативи кои ги спречуваа американските компании да работат во странство.