Турбуленции и во високото образование

Министерството за обравование (МОН) најавува коренити промени и во високото образование во Северна Македонија. Планот е да се направат големи промени во Законот за високо образование коишто ќе значат реорганизација. Па така, место Агенција за квалитет во високото образование ќе има одбор за акредитација и евалуација, кој ќе биде со сосема поинакви правила и принципи.

„Тоа сигурно ќе придонесе за зголемување на квалитетот на образованието“, вели министерката за образование и наука, Весна Јаневска.

Некои студиски програми ќе се укинат – ќе се воведат нови

Таа неодамна посочи дека работата на сегашната Агенција за квалитет во високо образование не ги задоволува потребите, поради што е потребно да се надмине овој проблем. Планот на МОН во иднина е да се воведат нови студиски програми, некои да се стават во мирување, а дел да се укинат, со цел студентите да го добијат она што им е потребно за пазарот на труд.

Што се однесува до Националниот совет, министерката смета дека и натаму треба да постои, но се договараат неговите ингеренции и на другите институции, како што се МОН, Одборот за акредитација и сите други. Во подготовката на новиот закон покрај експертите од министерството се вклучени и претставници од сите државни и приватни универзитети.

Јавна расправа

Формирано е ад-хок тело кое треба да работи на подобрување на квалитетот во високото образование. „Во него побаравме да делегираат претставници сите приватни и државни универзитети“, вели Јаневска.

Во телото има професори, декани, ректори, кои заедно со преставници на МОН формирале работни групи кои ќе работат на законот за високо образование. „При крај се со решенијата за да излезе новиот закон, кој кога ќе биде дефинитивно готов ќе оди на подолготрајна јавна расправа и нема да биде само 20 дена на ЕНЕР“, најавува министерката.

Тој ќе биде доставен до сите универзитети, а ќе се организира и јавна расправа по што ќе се анализираат и сублимираат препораките од вработените во високото образование. „Потоа ќе излеземе со конечна верзија“, вели Јаневска.

МОН неодамна започна постапка и за промена на концепцијата за средно гимназиско образование, што предизвика лавина реакции во јавноста.