ТВ хеликоптер се урна во Лос Анџелес, повеќе загинати

Најмалку три лица загинаа кога хеликоптер на американската телевизиска мрежа Ен-Би-Си се урна во близина на местото на смртоносна сообраќајна несреќа во Лос Анџелес. Според противпожарната служба, најмалку едно лице од загинатите било пешак. Уште едно лице е пренесено во болница, но неговата состојба засега е непозната.

Телевизиската станица Ен-Би-Си Лос Анџелес потврди дека станува збор за нивен хеликоптер. Во времето на несреќата, леталото известувало за сообраќајна несреќа што се случила во непосредна близина. Непосредно пред несреќата, станицата изгубила контакт со луѓето во хеликоптерот. Засега не е познато дали има жртви меѓу луѓето во хеликоптерот, ниту колку луѓе биле во него.

Според достапните информации, хеликоптерот се урнал во вторник вечерта по локално време во северозападниот дел од градот, областа Чатсворт, помеѓу две деловни згради, по што се запалил. Повеќе од 50 пожарникари учествувале во гаснењето на пожарот, објави противпожарната служба.

Смртоносна сообраќајна несреќа во близина

Малку порано во непосредна близина се случила тешка сообраќајна несреќа. Според пожарникарите, патничко возило се судрило со градски автобус. Во судирот загинале најмалку две лица, додека шест се повредени.

Локалните медиуми објавија дека по несреќата, неколку телевизиски станици испратиле хеликоптери над местото на настанот да следат и да известуваат за судирот.

Според соопштението од противпожарната служба, околностите на падот на хеликоптерот ги истражуваат Националниот одбор за безбедност во сообраќајот на САД и Федералната администрација за воздухопловство.

Извор: DW