ПУБЛИКУМ Вистината на прво место
Уморот јасно му се читаше на лицето на Володимир Зеленски кога вчера попладне застана пред микрофоните во Анкара. Украинскиот претседател предупредува дека сега не треба да се прават грешки, мислејќи на американско-руската средба во Саудиска Арабија.
Средбата беше изненадување за Украина, за неа дознале преку медиумите. „Не знам кој останува или оди таму и, да бидам искрен, не ми е ни грижа“, рече Зеленски. „Но, не ми е сеедно што мислат нашите партнери за нас. Ние сме искрени и отворени. Не сакам никакви случајности и затоа нема да одам во Саудиска Арабија“.
Чекор наназад по Безбедносната конференција во Минхен
Украинскиот претседател е лут. Средбата во Ријад – од перспектива на Киев, за Москва е полн погодок. И тоа и покрај фактот што украинската делегација штотуку се обиде да ги убеди Американците на Минхенската безбедносна конференција.
Зеленски во Анкара истакна дека тие сакаат мир, но фер договор, а не договор што се решава зад грбот на Украина. Но, Американците повеќе не се грижат за украинските интереси, вели истражувачката на конфликти Марија Солкина.
Украина се потпира на Европа
„Ни останува сè уште одреден маневарски простор: една од најважните точки е позицијата на европските партнери”, вели Солкина. Она што сега ѝ оди во прилог на Украина е фактот дека интересите на обединета Европа се извадени од можните договори со Владимир Путин.
Фактот што САД може да ја напуштат не само Украина, туку и цела Европа со неа, парадоксално дава мала искра надеж во Киев. Сега Европејците конечно треба да се разбудат – тоа е размислувањето во Украина – и конечно да инвестираат повеќе во својата одбрана. Марија Солкина сега го насочува своето внимание кон Париз: „Ни оди во интерес што (францускиот претседател Емануел) Макрон е одушевен за идејата европската безбедност во основа да треба да биде помалку зависна од САД“.
И покрај проблемите со мобилизацијата и финансиската и воената зависност, Украина самата произведува оружје што би можела да го користи одреден временски период доколку Американците целосно ја прекинат нивната помош. „Значи ситуацијата е тешка, но има на што да сметаме.”
Зеленски: Војната нема да се добие на бојното поле
А сепак: Русија има многу повеќе ресурси – повеќе луѓе, повеќе оружје и сигурни партнери кои обезбедуваат дополнителна поддршка и со луѓе и со оружје. На прес-конференцијата во Анкара, Володимир Зеленски користеше претпазливи тонови:
„Мислам дека денес е јасно дека ниту една страна нема да ја добие оваа војна со оружје на бојното поле. Русија го сакаше ова, но не го постигна. Тие не веруваа во Украина, но Украина се докажа.
Украина ја бранеше својата независност по многу висока цена, со животите на своите војници и народ,” истакна украинскиот претседател.
Во Киев денеска се очекува американскиот специјален претставник за Украина, Кит Келог. Но, не само по руско-американскиот состанок во Саудиска Арабија, многумина се прашуваат колкаво влијание Келог всушност сè уште има врз американскиот претседател Доналд Трамп.
Извор: DW
