Унгарскиот кредит ќе се враќа со три години грејс период и 15 години рок за отплата

До три години грејс период и до 15 години рок на отплата се условите под кои домашните банки ќе можат да работат со унгарскиот кредит од 250 милиони евра, наменет за кредитирање на стопанството, изјави денеска премиерот Христијан Мицкоски по средбата со Македонската банкарска асоцијација, но додаде дека се уште не е договорено колкава камата банките би им додале на фирмите што ќе аплицираат за овие средства.

„Во врска со желбата да се учествува во проектот, Македонската банкарска асоцијација, нејзините членки и членови сите изразија желба да учествуваат во овој процес. Во делот на рочноста ставовите се заеднички, во зависност од барањата на клиентите да се користи формулацијата до три години грејс период и до 15 години рок на отплата. Во делот на каматата дополнително ќе се преговара. Очекувам до крајот на следната недела да имаме некој став и да го заокружиме решението кое ќе треба да се пренесе на комапниите“, рече Мицкоски.

Тој посочи дека целта на преговорите ќе биде каматата која што ќе ја понудат банките да биде што е можно пониска, иако посочи дека банките имаат и свои трошоци.

„Да видиме што може од нивните трошоци да се намали, тоа ќе зависи и од политиките на Централната банка. Да не зборуваме за проценти, да ги доближиме ставовите, па да излеземе со официјална позиција“, рече Мицкоски.

Извор: МЕТА