Уште една жртва од кочанската трагедија, почина пациент кој се лекувал во Литванија

Во болница во Литванија починал пациент кој се лекувал откако настрадал во пожарот во импровизираната кочанска дискотека „Пулс“. Идентитетот на жртвата сè уште не е потврден официјално, но повеќе медиуми од земјава објавија дека станува збор за Александар Карадаковски, управителот на компанијата „МММ Кафе“ ДООЕЛ којашто управувала со кабарето „Пулс“.

Ова е 60-та жртва од пожарот во Кочани кој се случи утрото на 16 март.

Министерството за здравство закажа прес-конференција во 13:30 часот, на која се очекува официјална потврда на идентитетот на починатиот пациент. Покрај Карадаковски, во Литванија во моментов се лекува уште еден повреден во несреќата – Андреј Постоловски.

На 16 март во импровизираната дискотека „Пулс“ во Кочани се случи пожар во кој животот го загубија 59 лица, а од нив 6 малолетници, додека околу 200 беа повредени. Првичните сознанија покажаа дека дискотеката работела со фалсификувана лиценца.

Државниот јавен обвинител, Љупчо Коцевски неколку дена по катастрофата соопшти дека осомничени се вкупно 34 лица, вклучувајќи ги сопственикот и управителот на дискотеката „Пулс“, обезбедувањето, поранешен министер, државен секретар, раководители на сектор и одделение, помлад соработник, поранешни градоначалници, директори на пазарен инспекторат, инспектори, градоначалници, продавачи на билети, неколку компании, полициски службеници. Коцевски кажа дека сите тие знаеле оти дискотеката не ги исполнува условите, но придонеле кон тоа таа да работи и да организира концерти и забави.

Извор: МЕТА