На протестот ќе се адресираат три главни проблеми, нефункционалноста на системот за заштита на децата и младите кои се во судир со законот, недоволната безбедност во градовите и глорификацијата на девијантното однесување
Иницијативата „Кој е следен“ информираше дека утре, 2 Февруари, во 17 часот повторно ќе се одржи протест на булеварот „Партизански Одреди“, кај Универзална сала во Скопје. Посочуваат дека случајот со трагичната смрт на младата Фросина Кулакова не е изолиран, дека се повторуваат истите случаи на неконтролирано возење на сообраќајниците, а се повторува и неказнувањето и недолжното згаснување на животи. „Фрустрирани од состојбите што не се менуваат, повикуваме на изразување на граѓански револт. Системот ги отфрла децата и младите кои поради недоволна грижа го избираат погрешниот пат. Институциите не се координирани и тоа доведува до млади кои не ја добиваат потребната поддршка за да бидат активни чинители во општеството. Тој недостиг на поддршка резултира до сѐ почести фатални последици“, посочуваат од Иницијативата.
На протестот ќе се адресираат три главни проблеми, нефункционалноста на системот за заштита на децата и младите кои се во судир со законот, недоволната безбедност во градовите и глорификацијата на девијантното однесување.
„Алките во системот за работа со деца и млади во судир со законот не функционираат. Неопходно е градовите да можат да гарантираат безбедни услови за живот. Од исклучителна важност е да се поттикне јавната свест кон гласно осудување на глорификацијата на девијантното однесување. Круцијално е да се информираат граѓаните за последиците од возвишувањето на неказнивоста и заобиколувањето на правилата,“ посочуваат од „Кој е следен“.
Извор: МЕТА
ПУБЛИКУМ Вистината на прво место
