Увид во градежните работи на објектот на СВР Куманово од страна на министерот Спасовски

„Со денешната посета на СВР Куманово, покрај редовниот работен карактер имавме за цел непосредно да направиме увид во досега сработеното во поглед на реконструкцијата и санацијата на објектот на Секторот за внатрешни работи Куманово. Ова е еден од најстарите објекти можеби и во најлоша кондиција во државата кој што започнавме да го реконструираме и навистина работиме на една темелна и квалитетна реконструкција, особено што мораме да имаме во предвид дека еден дел од зградата е изграден во 1929 година, а во последните 50 години немаме скоро никакви реконструкции во овој дел. Тоа покажува дека треба навистина сериозно да се зафатиме со реконструкција и токму поради тоа сме посветени во овој период, покрај другите објекти кои што ги работиме на територијата на целата држава, да го завршиме и објектот на СВР Куманово“, истакна министерот за внатрешни работи Оливер Спасовски при посетата на СВР Куманово нагласувајќи дека до сега, за овие три и пол години, реконструирани биле 54 објекти, додека во моментов се работи на реконструкција и санација на четири објекти: Секторот за внатрешни работи Куманово, Полициската станица Ресен и Полициските одделенија Маврово-Ростуше и Дојран.

„За сите овие објекти се изведува темелна реконструкција. Овде веќе еден дел од објектот е завршен и ние очекуваме, во рамки на предвидените рокови, некаде најдоцна до први август да заврши целосната реконструкција на објектот на СВР Куманово“, потенцираше министерот Спасовски.

Министерот Спасовски ја искористи приликата, во контекст на денешниот Меѓународен ден на енергетска ефикасност, да нагласи дека при реализацијата на овие програмски приоритети Министерството се водело од потребата за домаќинско, економично трошење како на вложените средства така и во поглед на користењето материјали што ќе гарантираат значителна енергетска ефикасност и заштеда, без притоа да се намалува на квалитетот или потребните стандарди.

„Најголемиот дел од зградите ги реконструираме со квалитетни материјали, односно материјали кои одговараат на заштитата на животната средина и на здравјето на граѓаните, како и материјали кои што нудат енергетска ефикасност. Таков е случајот и со оваа зграда денеска, впрочем се трудиме, покрај создавањето на добри услови за полициските службеници, да  користиме и вакви материјали кои што ќе бидат во функција на енергетска ефикасност и заштеда на МВР. Меѓутоа даваме и придонес во заштитата и на животната средина и токму затоа конкретен пример може да биде и СВР Куманово, каде што започнуваме со гасификација на целиот овој објект а на тој начин допринесуваме и кон оваа цел – да ја заштитиме животната средина“, рече министерот Спасовски .

Министерот Спасовски најави дека продолжуваат активностите за создавање подобри услови за работа и поголема опременост на македонската полиција, се’ со цел подобрување на сигурноста и безбедноста на граѓаните.