Ватикан: Над 128.000 луѓе се збогувале со папата Франциско

Напливот не стивнува: На почетокот на третиот и последен ден од изложувањето на телото на папата Франциско во базиликата Свети Петар, Ватикан објави дека досега имало речиси 130.000 посетители.

Помеѓу 11 часот наутро во средата и 8 часот наутро во петок, „повеќе од 128.000 луѓе влегоа во базиликата Свети Петар за да се простат со папата, соопшти Ватикан.

Поради напливот на верници, базиликата мораше двапати да остане отворена долго по полноќ.

Во средата наутро, телото на папата беше пренесено на свечена церемонија од папската резиденција Санта Марта во базиликата до папскиот олтар. Денеска во 20 часот, ковчегот ќе биде свечено запечатен.

Во сабота Франциско, по реквиемската миса на плоштадот Свети Петар, според сопствена желба, како прв папа по повеќе од еден век, нема да биде погребан во базиликата Свети Петар, туку во папската базилика Санта Марија Маџоре во центарот на Рим. Неговото последно почивалиште ќе биде едноставен земјен гроб со латински натпис „Франциско“.

На реквиемот на плоштадот Свети Петар се очекува да присуствуваат повеќе од 200.000 луѓе. Своето учество најавија делегации од најмалку 130 земји, вклучително и над 50 шефови на држави и влади.

Меѓу оние кои го потврдија своето присуство се американскиот претседател Доналд Трамп, аргентинскиот претседател Хавиер Милеи,германскиот претседател Франк-Валтер Штајнмајер и генералниот секретар на ОН, Антонио Гутереш.

Папата Франциско почина на Велигденскиот понеделник во неговата резиденција во Санта Марта, откако присуствуваше на велигденската миса претходниот ден. 88-годишниот папа беше хоспитализиран со недели во февруари и во март поради тешка пневмонија.

Извор: DW