Во 2021 година Македонија одбележа јубилејни 100 години од раѓањето на Блаже Конески

03.01.2022 Магазин

На 19 декември, 1921 година е роден најистакнатиот македонски книжевник, поет, академик, лингвист и најголемиот македонски литературен и културен одблесок што сведочи за развојот на Македонија и нејзината македонистика. Годината што изминува беше година проследна со низа настани во кои професори, филозофи, лингвисти, уметници, сликари, музичари и сите останати интелектуалци оддадоа почит врз неговото творештво коешто остави трага.

Програмата што беше делумно планирана и најавена, а делумно подоцна инспирирана, ја одбележи 2021 година преку следните настани и прилози.

Во 2021 година Македонија одбележа јубилејни 100 години од раѓањето на Блаже Конески — Минатата година беше усвоена националната програма на владата 2021 година да биде прогласена за година во чест на Блаже Конески, големиот македонски книжевен деец и доајен на македонскиот јазик. Со програмата која се реализираше преку низа активности и настани на повеќе институции, министерства, органи на државната управа, здруженија во земјава и во странство, нашата држава официјално се приклучи кон одлуката на Генералното собрание на Обединетите нации да ја прогласи 2021 година за Меѓународна година на мирот и довербата. Од особена важност е што и мирот и довербата се сеприсутни елементи во творештвото и научната дејност на Конески. 19 декември, денот на неговото раѓање беше запишан на Листата на УНЕСКО за одбележување значајни јубилеи во светот во текот на 2021 година. Во седиштето на УНЕСКО во Париз, на 21 март по повод Светскиот ден на поезијата песни од Конески, на своите јазици прочитаа повеќе високи дипломатски претставници.

Делото и творештвото на почитуваниот македонски академик треба да се разбира, осознава, негува и пречитува постојано и секојдневно, знаејќи дека претставува културно богатство со непроценлива вредност за македонската литература. Тој ги остави зад себе „Македонскиот правопис со правописен речник“, „Граматиката на македонскиот јазик“, кога пишувајќи ги трите книги за „Речникот на македонскиот јазик“ го опеа „Мостот“ меѓу „Земјата и љубовта“ што како „Везилка“ го везеше неговиот пат кон „Средбата со рајот“ и останатите многу други.

Извор:МЕТА