ПУБЛИКУМ Вистината на прво место
Од 142 европски градови, Скопје е на 124 место на ранг листата на високи трошоци за живот, според индексот којшто го објави на почетокот на годината од „Нумбео“, глобална база на податоци што ги мери трошоците за живот во светот. Според индексот за јануари, Љубљана, Атина, Сплит, Солун и Загреб се меѓу најскапите градови во регионот и се рангирани од 76 до 85 место на ранг листата. Потоа следува Тирана на 92 место на најскапи градови во Европа, а зад неа се Белград, Скопје, Сараево, Подгорица, Софија, Букурешт и Будимпешта.
Поевтино се живее во Ниш и Приштина
Поевтино за живеење од Скопје е само во Ниш и во Приштина од регионот, додека останатите градови коишто се на дното на листата се претежно во Русија и во Украина.
Индексот на трошоците на животот ги зема предвид трошоците за кирија, другите месечни трошоци освен киријата, индексот на намирници, цените на рестораните и индексот на локалната куповна моќ. Проценетите месечни трошоци за четиричлено семејство во Скопје се 118.653 денари без кирија.Проценетите месечни трошоци за едно лице се 34.557 денари без кирија.Скопје е за 68,4% поевтин од Њујорк (без кирија). Киријата во Скопје е во просек за 92,3% пониска отколку во Њујорк.
Индексот на трошоците на животот се пресметува како процент од трошоците на Њујорк. На пример, трошоците за живот во Тирана се 41,9% од Њујорк. Во Белград трошоците за живот се 39,4% од Њујорк, во Подгорица 35.5%, во Сараево 33,2%, во Скопје 31,6% и во Приштина 25,2%.
Каде има најевтини ресторани?
Половина од европските градови имаат куповна моќ над просекот во Њујорк. Во меѓувреме, во Сараево куповната моќ е 63,4% од Њујорк, во Подгорица е 62,7%, во Скопје 60,1%, Белград 57,8% и во Приштина 57,1%.
Приштина е најевтина со ресторани кои имаат цени дури 21,8 отсто од њујоршкиот просек.
На врвот на листата со најскапи трошоци за живот се Цирих, Женева, Базел и Берн во Швајцарија. Минхен е рангиран на 15 место на листата со индекс 65.3 отсто и е најскапиот град за живеење во Германија.
