За Велигден Крушево полно со туристи

За време на продолжениот велигденски викенд, Крушево “вриеше“ од туристи, што можеше да се забележи преку исполнетите капацитети на хотелите, кафулињата, рестораните и продавниците.

Градоначалникот Томе Христоски, смета дека зголемената посетеност е резултат на промоцијата на Крушево како туристичка дестинација.

„Работиме многу на промоција на Крушево како туристичка дестинација, но и самата домаќинска работа на локалната самоуправа која резултира со многу проекти, служат како промоција на нашиот град. Секако, овој викенд во Крушево беа присутни многумина кои потекнуваат од овде, но и посетители кои и претходно престојувале тука па поради стекнатиот убав впешаток, повторно се враќаат“, вели Христоски.

Во изминатите четири денови, градот беше посетен од претежно домашни посетители, но и странски гости од соседните земји и од Балканот.