Заев сака нови ликови во СДСМ, не знае дали Шекеринска се дистанцира од него

По најавите дека Радмила Шекеринска нема да се кандидира за негова заменичка, лидерот на СДСМ вели дека нивната соработка и понатаму ќе продолжи.

Радмила Шекеринска по осум години повеќе нема да му биде заменичка во партијата на лидерот на СДСМ, Зоран Заев, но тој најавува дека нивната соработка и понатаму ќе продолжи.

„Шекеринска е една од најзаслужните за нашето членство во НАТО, за преговорите со ЕУ. Јас ќе продолжам да соработувам. Верувам дека на многу заеднички проекти ќе соработувамe“, порача денеска премиерот. Тој додава дека таа не поднела  оставка, туку најавила дека нема намера да се кандидира за заменик претседател во следниот мандат. „Ние заедно прифативме да го водиме СДСМ во едно многу тешко време“, дециден е Заев.

Радмила Шекеринска, која ја извршува функцијата министер за одбрана, вчера најави дека нема да се кандидира повторно за заменик-претседателка на СДСМ, на претстојниот конгрес на СДСМ во мај. Таквиот потег во јавноста се толкуваше како нејзино можно дистанцирање од премиерот, но се актуелизираа и шпекулациите дека е можен нејзин ангажман како амбасадор во Вашингтон, престижна позиција којашто се уште не е пополнета.

Заев одговарајќи на новинарско прашање, денеска рече дека прашањето дали Шекеринска со повлекување од партиската функција се дистанцира од него, треба да се упати на нејзина адреса.

„Шекеринска ќе ја прашате дали се дистанцира од мене. Taa e eдна од моите први соработници“, вели тој. Во однос на шпекулациите за амбасадорското место, тој вели дека немаат разговаразно за тоа, бидејќи Шекеринска е министер за одбрана. „Би било невнимание да се разговара за тоа. Мислењето на Радмила за Зоран Заев, треба да го каже Радмила. Јас и Радмила, како и огромен процент на раководството, се договоривме да го возобновиме СДСМ, да дадеме шанса на нови ликови. Луѓето сакаат во 21 век инвентивности кои ќе го забрзаат растот на државата“, вели Заев.

Министерката за одбрана Радмила Шекеринска, актуелна заменик-претседателка на СДСМ, вчера објави дека нема да се најде на кандидатската листа за функција на претстојниот изборен конгрес на партијата, кој треба да се одржи на 16 мај.

„Добив прашање од мојата општинска организација дали сум кандидат, кажав дека не сум, затоа што сметам дека и СДСМ и политичката сцена на С. Македонија, одат напред кога постојано продуцираат нови кадри. Апсолутно, пристапот кон конгресот треба да ни биде да формулираме и нови политики, а тие да бидат подобри“, изјави таа.

Во однос прашањето дали е потенцијална кандидатка за амбасадорка во САД, таа вели: „Во ниту еден момент не сум учествувала во дискусија по ова тема. Таа тема долго време беше интересна за јавноста, имаше информаци, дезинформаци, деманти“. Според Шекеринска, се работи за многу важно место, кое што особено станува значајно имјаќи предвид дека новоизбраниот претседател на САД доаѓа со една нова поактивна политика и на Балканот. „Тоа е прашање за кое не се дискутира преку изјави, туку во рамки на МНР, па во Владата и во соработка со претседателот. Јас се чуствувам заморено да дезинформираме, па да демантираме. Мислам дека е срамота за едно такво место да се игра медиумска игра“, додава таа.

На конгресот на 16 мај, делегатите треба да гласаат за нов заменик-претседател на СДСМ, а треба да се избере и нов состав на Централниот одбор на партијата и нов Надзорен одбор.

Извор: DW

Прочитајте повеќе

полиција

Двајца приведени за убиството на лекарот во Железара

Две лица се приведени во врска со убиството на лекарот во скопската населба Железара, изјави …