ПУБЛИКУМ Вистината на прво место
Затвореник од скопскиот затвор „Идризово“ седум месеци преку мобилен телефон се јавувал на различни лица, лажно се претставувал како директор и успеал да измами седум лица и да причини материјална штета од околу 315.000 денари (над 5.100 евра), информираат од Министерството за внатрешни работи (МВР).
„СВР Тетово поднесе кривична пријава против Б.А.(34) од Скопје, поради постоење основи на сомнение за сторени седум кривични дела „измама“. Во периодот од 02.07.2019 до 13.02.2020, додека бил на издржување казна затвор во Казнено-поправната установа Затвор „Идризово“ – Скопје, преку мобилен телефон лажно се претставувал како сопственик или раководител на различни фирми и лицата К.Б.(65), С.К.(47), Џ.Л.(55) од Тетово, А.Х.(36), Ј.М.(67) од Скопје, С.С.(40) од с.Џепчиште и М.Б.(62) од с.Беловиште ги довел во заблуда дека неговата фирма деловно ќе соработува со нив и од нив успеал да земе парични средства“, се наведува во дневниот билтен на МВР.
Инаку, мобилните телефони според актуелните законски прописи се забранети за поседување од страна на затворениците во сите затворски установи во земјава.
