За 34 здравствени установи низ земјава ќе се набавуваат 1.300 кревети и 700 телевизори

Министерството за здравство ги објави двата тендера за реновирање на 34 здравствени установи низ земјава, како и за набавка на 1.300 болнички кревети и 700 телевизори за потребите на овие установи. Тендерот за набавка на градежно – занаетчиски работи ќе опфати комплетно молерисување на здравствените објекти, поправка и репарирање на внатрешните врати и прозорци и замена на зидните и подните плочки и на галантеријата во тоалетите.

„Со реновирање на здравствените установи низ целата земја, на медицинскиот персонал ќе им овозможиме подобри услови за работа, но и подобри и подостоинствени услови на пациентите за престој во болница“ соопштуваат од Министерството за здравство.

Двете тендерски постапки ќе бидат отворени до првата половина на септември, по што Министерството за здравство ќе ги избере најповолните понудувачи за градежно – занаетчиските работи и за опремување на здравствените установи со нови болнички кревети и телевизори. Вкупната вредност на инвестицијата ќе се знае по изборот на најповолните понуди и потпишувањето на договорите со компаниите.

Здравствените установи ќе се реновираат во рок од 60 дена по добивањето на одобрение за извршување на градежно – занаетчиските работи, се наведува во тендерот објавен на Електронскиот систем за јавни набавки (ЕСЈН). Набавката на болничката опрема ќе се врши постепено, и тоа во период од 90 дена по добивањето писмено барање за креветите и во рок од 30 дена за телевизорите. Доколку успешно се спроведат тендерските постапки, реализацијата на проектот за реновирање на здравствените установи ќе може да започне претстојната есен.

Извор: МЕТА